Die 27 maii
1. Sancti Augustíni, epíscopi Cantuariénsis in Anglia, qui una cum áliis mónachis a sancto Gregório papa Magno missus ad verbum Dei Anglórum genti prædicándum, ab Ædilbérto rege Cántiæ benévole accéptus, apostólicam primitívæ Ecclésiæ vitam ímitans, regem ipsum multósque ad fidem christiánam convértit et nonnúllas hac in terra sedes constítuit episcopáles. Die vero vigésima sexta maii óbiit.
2. Doróstori in Mœsia, sancti Iúlii, mártyris, qui, témpore persecutiónis, cum esset veteránus et eméritæ milítiæ, comprehénsus est ab officiálibus et Máximo prǽsidi oblátus; quo præsénte, cum exsecrarétur idóla et Christi nomen constantíssime confiterétur, capitáli senténtia punítus est.
3. Via Nomentána miliário décimo sexto ab urbe Roma, sancti Restitúti, mártyris.
4. Arausióne in Província Gálliæ, sancti Eutrópii, epíscopi.
5. Herbípoli in Francónia Germániæ, sancti Brunónis, epíscopi, qui ecclésiam cathedrálem restítuit, clerum reformávit et Sacras Scriptúras pópulo enarrávit.
6 *. In monastério Montis Sálvii apud Arvérnam Aquitániæ, sancti Gausbérti, presbyteri et eremítæ, cuius ópera locus ille, ántea hórridus, hospítium factus est ad peregrínos suscipiéndos.
7 *. In loco Dryburne apud Dunélmum in Anglia, beatórum Edmúndi Duke, Richárdi Hill, Ioánnis Hogg et Richárdi Holiday, presbyterórum et mártyrum, qui, a Collégio Anglórum Reménsi in pátriam regréssi, sub Elísabeth regína Prima propter solum sacerdótium cápite damnáti, patíbulo suspénsi sunt.
8. Seuli in Coréa, sanctórum mártyrum Bárbaræ Kim, víduæ, et Bárbaræ Yi, vírginis, quíndecim annos natæ, quæ simul pro Christo in cárcere deténtæ peste obiérunt.
9. In loco Nabiwubo in Ugánda, sancti Athanásii Bazzekuketta, mártyris, qui ex iuvénibus régiæ domus, nuper baptizátus, dum ad locum supplícii pro Christi fide accépta cum céteris ducebátur, carnífices rogávit, ut eum íllico occíderent, et, íctibus percússus, martyrium complévit.
10. In loco 1ubamo item in Ugánda, sancti Gonzágæ Gonza, mártyris, qui e fámulis régiis, dum compédibus impedítus ad rogum ducebátur, a carnifícibus lánceis transfóssus est.
Et álibi aliórum plurimórum sanctórum Mártyrum et Confessórum, atque sanctárum Vírginum.
r. Deo grátias.
v. Pretiósa in conspéctu Dómini, (T.P. Allelúia.)
r. Mors sanctórum eius, (T.P. Allelúia.)
r. Mors sanctórum eius, (T.P. Allelúia.)
Lectio brevis (Iac 5, 8-11)
Patiéntes estóte, et vos, confirmáte corda vestra, quóniam advéntus Dómini appropinquávit. Nólite ingemíscere fratres, in altérutrum, ut non iudicémini; ecce iudex ante iánuam assístit. Exémplum accípite, fratres, labóris et patiéntiæ prophétas, qui locúti sunt in nómine Dómini. Ecce beatificámus eos, qui sustinuérunt; sufferéntiam Iob audístis et finem Dómini vidístis, quóniam miséricors est Dóminus et miserátor.
Verbum Dómini. r. Deo grátias.
Sancta María et omnes Sancti intercédant pro nobis ad Dóminum, ut nos mereámur ab eo adiuvári et salvári, qui vivit et regnat in sǽcula sæculórum. r. Amen.
Absente sacerdote vel diacono, et in recitatione a solo, sic concluditur:
Dóminus nos benedícat, et ab omni malo deféndat, et ad vitam perdúcat ætérnam. r. Amen.
Et fidélium ánimæ per misericórdiam Dei requiéscant in pace. r. Amen.
v. Ite in pace. r. Deo grátias.
