Die 9 aprilis
1. Alexandríæ in Ægýpto, sancti Máximi, epíscopi, qui, dum présbyter erat, exsílium et fídei confessiónem cum sancto Dionysio epíscopo, cui póstea succéssit.
2. Ibídem, sancti Ædésii, mártyris, qui, sancti Apphiáni frater, sub Maximíno imperatóre, cum iúdicem palam arguísset vírgines Deo dicátas lenónibus tradidísse, idcírco a milítibus tentus affectúsque supplíciis pro Christo Dómino in mare demérsus est.
3. Apud Sírmium in Pannónia, sancti Demétrii, mártyris, qui ubíque in Oriénte, máxime Thessalonícæ, pia cólitur venerátione.
4. Cæsaréæ in Cappadócia, sancti Eupsychii, mártyris, qui ob evérsum divæ Fortúnæ fanum, sub luliáno Apóstata imperatóre martyrium consummávit.
5. Cenómani in Gállia Lugdunénsi, sancti Libórii, epíscopi.
6. Amídæ in Mesopotámia, sancti Acácii, epíscopi, qui pro rediméndis Persis captívis ac diris tortis supplíciis clerum conflávit et sacra étiam Ecclésiæ vasa Románis véndidit.
7. Castríloci in Hannónia Néustriæ, sanctæ Valdetrúdis, quæ, soror sanctæ Aldegúndis, sancti Vincéntii Madelgárii coniunx et quáttuor sanctórum mater, marítum ímitans Deo se vovit et hábitum monásticum suscépit in cœnóbio ab ipsa cóndito.
8. Gemmétici item in Néustria, sancti Hugónis, epíscopi Rothomagénsis, qui monastérium Fontanellénse atque Ecclésias Parisiénsem et Baiocénsem simul rexit ac tandem, his munéribus depósitis, monastério Gemmeticénsi præfuit.
9 *. In loco Sancto Vincéntio prope Birovéscam in Castélla Hispániæ, sanctæ Casíldæ, vírginis, quæ, in religióne mahometána nata, christiános in cárcere deténtos misericórditer adiúvit et póstea vitam christiánam in erémo duxit.
10 *. Aurélii in pago Lemovicénsi Gálliæ, sancti Gauchérii, qui, canónicus reguláris, exemplar vitæ commúnis et animárum zeli cleric éxstitit.
Í1 *. Apud montem Senárium in Etrúria, beáti Ubáldi de Burgo Sancti Sepúlcri, presbyteri ex Ordine Servórum Maríæ, qui, ex militia terréstri ad servítium Maríæ a sancto Philíppo Benizi convérsus est.
12 *. Tanæ in India orientáli, beáti Thomæ de Tolentíno, presbyteri ex Ordine Minórum et mártyris, qui, ad Sinárum impérium usque progréssus ut Evangélium annuntiáret, ad Tártaros et Indos iter fáciens glorióso martyrio missiónem coronávit.
13 *. Bricherásii apud Pinerólium in Subalpínis, beáti Antónii Pavoni, presbyteri ex Ordine Prædicatórum et mártyris, qui, cum ecclésia egrederétur, ubi vixdum contra erróres prædicáverat, immániter trucidátus est.
14 *. In campo exítii Oświęcim seu Auschwitz prope Cracóviam in Polónia, beátæ Cælestínæ Faron, vírginis e Congregatióne Servulárum Immaculátæ Concéptæ et mártyris, quæ, Polónia more militári in bello occupáta, in cárcerem propter Christi fidem detrúsa est et cruciátibus confécta ad gloriósam pervénit corónam.
Et álibi aliórum plurimórum sanctórum Mártyrum et Confessórum, atque sanctárum Vírginum.
r. Deo grátias.
v. Pretiósa in conspéctu Dómini, (T.P. Allelúia.)
r. Mors sanctórum eius, (T.P. Allelúia.)
r. Mors sanctórum eius, (T.P. Allelúia.)
Lectio brevis (Col 3,1-4)
Si conresurrexístis Christo, quæ sursum sunt quǽrite, ubi Christus est in déxtera Dei sedens; quæ sursum sunt sápite, non quæ supra terram. Mórtui enim estis, et vita vestra abscóndita est cum Christo in Deo! Cum Christus apparúerit, vita vestra, tunc et vos apparébitis cum ipso in glória.
Verbum Dómini. r. Deo grátias.
Sancta María et omnes Sancti intercédant pro nobis ad Dóminum, ut nos mereámur ab eo adiuvári et salvári, qui vivit et regnat in sǽcula sæculórum. r. Amen.
Absente sacerdote vel diacono, et in recitatione a solo, sic concluditur:
Dóminus nos benedícat, et ab omni malo deféndat, et ad vitam perdúcat ætérnam. r. Amen.
Et fidélium ánimæ per misericórdiam Dei requiéscant in pace. r. Amen.
v. Ite in pace. r. Deo grátias.
