Die 10 aprilis
1. In Africa, sanctórum Teréntii, Africáni, Máximi, Pompéii, Alexándri, Theodóri et quadragínta sociórum, mártyrum, qui sub Décio imperatóre pro fide christiána occubuérunt.
2. Alexandríæ in Ægýpto, sancti Apollónii, presbyteri et mártyris.
3 *. Autissiodóri in Néustria, sancti Palládii, epíscopi, qui, olim abbas monastérii Sancti Germáni, episcopátu accépto, plúrimis ádfuit concíliis et ad ecclesiásticam disciplínam instaurándam se cóntulit.
4 *. Gavélli in Venétia, sancti Bedæ iunióris, mónachi, qui, post annos quadragínta quinque in regum famulátu exáctos, réliquum ætátis ternpus in monastério Dómino servíre elégit.
5. Gandávi in Flándria, sancti Macárii, peregríni, qui, inter mónachos Sancti Bavónis benígne accéptus, insequénti anno pestiléntia consúmptus est.
6 *. Carnúti in Gállia, sancti Fulbérti, epíscopi, cuius doctrína plúrimos enutrívit, munificéntia industriáque ecclésiam cathedrálem inchoávit et pietátem erga Vírginem Maríam Regínam Misericórdiæ promóvit.
7 *. Tunéte ad oram Africæ septemtrionális, beáti Antónii Neyrot, presbyteri ex Ordine Prædicatórum et mártyris, qui, a pirátis in Africam vi ductus, apóstata factus est, sed, divína grátia adiuvánte, féria quinta in Cena Dómini hábitum religiósum públice resúmpsit, quod fácinus lapídibus óbrutus expiávit.
8 *. Placéntiæ in Æmília, beáti Marci de Bonónia Fantuzzi, presbyteri ex Ordine Minórum, pietáte, prudéntia prædicationéque clari.
9. Vallisoléti in Hispánia, sancti Michǽlis de Sanctis, presbyteri ex Ordine Sanctíssimæ Trinitátis, qui in ópera caritátis et verbi Dei prædicatiónem totum se impéndit.
10. Verónæ in Venétia, sanctæ Magdalénæ de Canóssa, vírginis, quæ sponte omnes patrimónii divítias abiécit, ut Christum sequerétur, et duplex Institútum fundávit, álterum Filiárum, álterum Filiórum a Caritáte ad christiánam institutiónem puerórum fovéndam.
11. Intra castra detentiónis Dacháni prope Monáchium Baváriæ in Germánia, beáti Bonifátii Żukowski, presbyteri ex Ordine Fratrum Minórum Conventuálium et mártyris, qui, belli tempestáte sæviénte, propter fidem cruciátibus fractus martyrium in cárcere perfécit.
Et álibi aliórum plurimórum sanctórum Mártyrum et Confessórum, atque sanctárum Vírginum.
r. Deo grátias.
v. Pretiósa in conspéctu Dómini, (T.P. Allelúia.)
r. Mors sanctórum eius, (T.P. Allelúia.)
r. Mors sanctórum eius, (T.P. Allelúia.)
Lectio brevis (Col 3,1-4)
Si conresurrexístis Christo, quæ sursum sunt quǽrite, ubi Christus est in déxtera Dei sedens; quæ sursum sunt sápite, non quæ supra terram. Mórtui enim estis, et vita vestra abscóndita est cum Christo in Deo! Cum Christus apparúerit, vita vestra, tunc et vos apparébitis cum ipso in glória.
Verbum Dómini. r. Deo grátias.
Sancta María et omnes Sancti intercédant pro nobis ad Dóminum, ut nos mereámur ab eo adiuvári et salvári, qui vivit et regnat in sǽcula sæculórum. r. Amen.
Absente sacerdote vel diacono, et in recitatione a solo, sic concluditur:
Dóminus nos benedícat, et ab omni malo deféndat, et ad vitam perdúcat ætérnam. r. Amen.
Et fidélium ánimæ per misericórdiam Dei requiéscant in pace. r. Amen.
v. Ite in pace. r. Deo grátias.
