Die 7 aprilis
1. Memória sancti Ioánnis Baptístæ de la Salle, presbyteri, qui Rothómagi in Normánnia Gálliæ in humánam christianámque institutiónem puerórum præsértim páuperum magnópere incúbuit, Fratrum Scholárum Christianárum Congregatiónem instítuens, pro qua multas sustínuit tribulatiónes, de pópulo Dei præcláre méritus.
2. Commemorátio sancti Hegesíppi, qui ab Anicéto papa usque ad Eleuthérium Romæ vixit et históriam rerum ecclesiasticárum gestárum a Passióne Dómini usque ad ætátem suam símplici sermóne téxuit.
3. Alexandríæ in Ægýpto, sancti Pelúsii, presbyteri et mártyris.
4. In Pentápoli Líbyæ, sanctórum mártyrum Theodóri, epíscopi, Irenæi, diáconi, Serapiónis et Ammónis, lectórum.
5. Pompeiópoli in Cilícia, sancti Calliópii, mártyris.
6. Sinópe in Ponto, sanctórum ducentórum mílitum mártyrum.
7. Mytilénis in ínsula Lesbo, sancti Geórgii, epíscopi, qui pro cultu sacrórum I máginum sub Leóne Arméno imperatóre multa passus est.
8 *. Apud monastérium Crispiniénse in Hannónia, sancti Aibérti, presbyteri et mónachi, qui in solitúdine cotídie genufléxus vel prostrátus totum psaltérium recitábat et pæniténtibus ipsum accurréntibus divínam ministrábat misericórdiam.
9 *. In monastério Præmonstraténsium Steinfeldénsi in Germánia, sancti Hermánni Ioséphi, presbyteri, qui suavíssimo erga Vírginem Maríam amóre refúlsit et devotiónem erga divínum Cor Iesu hymnis et láudibus celebrávit.
10. Eboráci in Anglia, sancti Henríci Walpole, e Societáte Iesu, et beáti Alexándri Rawlins, presbyterórum et mártyrum, qui, sub Elísabeth regína Prima propter sacerdótium in víncula cónditi et crudéliter vexáti, demum ad patíbulum ducti láqueo ferróque ad ætérnam pervenérunt corónam.
11 *. Vigórniæ item in Anglia, beatórum mártyrum Eduárdi Oldcorne, presbyteri, et Radúlphi Ashley, religiósi e Societáte Iesu, qui multos annos clam ministérium exercuérunt, donec, falso insimuláti quod in lacóbum regem Primum coniuráti essent, in cárcerem missi sunt et excruciáti tandémque adhuc spirántes dire dissécti.
12. In Cocincína, sancti Petri Nguyen Văn Liu, presbyteri et mártyris, qui, sub imperatóre Tu Duc cápite damnátus, in patíbulo lætabúndus óbiit.
13 *. In loco Dongerkou in Sinis, beátæ Maríæ Assúmptæ Pallotta, vírginis e Soróribus Franciscánis Missionáriis Maríæ, quæ, humílibus onéribus addícta, simplex et ignóta pro Christi regno vitam egit.
Et álibi aliórum plurimórum sanctórum Mártyrum et Confessórum, atque sanctárum Vírginum.
r. Deo grátias.
v. Pretiósa in conspéctu Dómini, (T.P. Allelúia.)
r. Mors sanctórum eius, (T.P. Allelúia.)
r. Mors sanctórum eius, (T.P. Allelúia.)
Lectio brevis (Col 3,1-4)
Si conresurrexístis Christo, quæ sursum sunt quǽrite, ubi Christus est in déxtera Dei sedens; quæ sursum sunt sápite, non quæ supra terram. Mórtui enim estis, et vita vestra abscóndita est cum Christo in Deo! Cum Christus apparúerit, vita vestra, tunc et vos apparébitis cum ipso in glória.
Verbum Dómini. r. Deo grátias.
Sancta María et omnes Sancti intercédant pro nobis ad Dóminum, ut nos mereámur ab eo adiuvári et salvári, qui vivit et regnat in sǽcula sæculórum. r. Amen.
Absente sacerdote vel diacono, et in recitatione a solo, sic concluditur:
Dóminus nos benedícat, et ab omni malo deféndat, et ad vitam perdúcat ætérnam. r. Amen.
Et fidélium ánimæ per misericórdiam Dei requiéscant in pace. r. Amen.
v. Ite in pace. r. Deo grátias.
