Die 17 aprilis
1. Meliténe in Arménia, sanctórum mártyrum Petri, diáconi, et Hermógenis, eius minístri.
2. In Pérside, pássio sancti Simeónis bar Sabas, epíscopi Seleucíæ et Ctesiphóntis, qui, iubénte Sápore Persárum rege Secúndo, comprehénsus ferróque onústus, cum solem adoráre noluísset et de Dómino Iesu Christo voce líbera et constantíssima testátus esset, primum carceráli ergástulo cum turba centum ámplius sociórum ex episcopátu, presbyterátu et divérsis clericórum ordínibus aliquámdiu macerátus est; deínde, féria sexta in Passióne Dómini, ómnibus ante Simeónis óculos, qui unumquémque eórum strénue exhortabátur, gládio iugulátis, novíssime et ipse decollátus est.
3. Item commemorántur plúrimi mártyres, qui post óbitum sancti Symeónis per totam Pérsidis regiónem pro Christi nómine sub eódem rege Sápore gládio cædi iussi sunt; inter quos sanctum Usthazádes, aulæ régiæ eunúchus, qui regis Sáporis nutrícius fúerat et, sæviénte primo persecutiónis æstu, mar rium súbiit in aula Artaxérxis, fratris ipsíus Sáporis, in Adiabéna província.
4. Derthónæ in Ligúria, sancti Innocéntii, epíscopi.
5. Meliténe in Armenia, sancti Acácii, epíscopi, qui in Concílio Ephesíno advérsus Nestórium fidem orthodóxam vindicáverat aC dein a sede iniúste depósitus est.
6. Viénnæ in Burgúndia, sancti Pantágathi, epíscopi.
7 *. In ínsula Egga inter Ebúdes interióres Scótiam prospiciéntes, sanctórum Donnáni, abbátis, atque sociórum quinquagínta et duórum monachórum, qui Paschália sollémnia celebrántes a pirátis igne vel gládio occísi sunt.
8. Córdubæ in Vandalícia Hispániæ regióne, sanctórum mártyrum Elíæ, presbyteri iam senis, Pauli et Isidóri, monachórum adhuc iuveníli ætáte, qui in Maurórum persecutióne ob christiánæ fídei professiónem interémpti sunt.
9. In monastério Casæ Dei apud Arvérnam in Gállia, sancti Robérti, abbátis, qui in eúndem locum, ubi solitárius commorabátur, fratres aggregávit et non parvam multitúdinem verbo prædicatiónis vitæque exémplo Dómino lucrátus est.
10. In monastério Molisménsi in Gállia, sancti Robérti, abbátis, qui, vitam monásticam simpliciórem strictiorémque quærens, iam cœnobiórum cónditor et rector indeféssus, necnon eremitárum præféctus et monásticæ disciplínæ restitútor exímius, Cisterciénse monastérium fundávit ac primus abbas rexit et in Molisménsi, quo abbas redíerat, in pace quiévit.
11 *. Perúsiæ in Umbria, beáti lacóbi de Cerquéto, presbyteri ex Ordine Eremitárum Sancti Augustíni, qui læte ægritúdinis tolerándæ præbuit exémplum.
12 *. Pisis in Etrúria, beátæ Claræ Gambacorti, quæ, adhuc aduléscens cóniuge orbáta, hortánte sancta Catharína Senénsi, ibídem primum monastérium Sancti Domínici fundávit sub austerióre régula atque soróribus prudéntia et caritáte pr fuit, patris fratrúmque suórum homicídis parcens.
13 *. Matríti in Hispánia, beátæ Maríæ Annæ a Iesu Navarro de Guevara, vírginis, quæ, patris dissentiónibus victis, hábitum Ordinis Beátæ Maríæ Vírginis de Mercéde suscépit et preces pænitentiásque pro míseris et afflíctis adhíbuit.
14 *. Londínii in Anglia, beáti Henríci Heath, presbyteri ex Ordine Fratrum Minórum et mártyris, sub Cárolo rege Primo propter solum sacerdótium Tybúrni carnífici tráditi.
15 *. Saltu in província Quebecénsi Cánadæ, beátæ Catharínæ Tekakwitha, vírginis, quæ, inter natívos Indiános orta, die Páschatis baptizáta, quam virginitátem nondum christiána serváre stúduit, earn Deo óbtulit, etsi minis multísque vexatiónibus afflícta.
Et álibi aliórum plurimórum sanctórum Mártyrum et Confessórum, atque sanctárum Vírginum.
r. Deo grátias.
v. Pretiósa in conspéctu Dómini, (T.P. Allelúia.)
r. Mors sanctórum eius, (T.P. Allelúia.)
r. Mors sanctórum eius, (T.P. Allelúia.)
Lectio brevis (1Cor15,13-14.16-17.20)
Si resurréctio mortuórum non est, neque Christus suscitátus est! Si autem Christus non suscitátus est, inánis est ergo prædicátio nostra, inánis est et fides vestra. Nam si mórtui non resúrgunt, neque Christus resurréxit; quod si Christus non resurréxit, stulta est fides vestra; adhuc estis in peccátis vestris. Nunc autem Christus resurréxit a mórtuis, primítiæ dormiéntium.
Verbum Dómini. r. Deo grátias.
Sancta María et omnes Sancti intercédant pro nobis ad Dóminum, ut nos mereámur ab eo adiuvári et salvári, qui vivit et regnat in sǽcula sæculórum. r. Amen.
Absente sacerdote vel diacono, et in recitatione a solo, sic concluditur:
Dóminus nos benedícat, et ab omni malo deféndat, et ad vitam perdúcat ætérnam. r. Amen.
Et fidélium ánimæ per misericórdiam Dei requiéscant in pace. r. Amen.
v. Ite in pace. r. Deo grátias.
