Die 9 maii
1. Commemorátio sancti Isaíæ, prophétæ, qui, in diébus Ozíæ, Iotham, Achaz et Ezechíæ, regum ludæ, missus est ut pópulo infidéli et peccatóri Dóminum fidélem et salvatórem reveláret, ad impleméntum promissiónis David a Deo iurátæ. Apud ludæos sub Manásse rege martyr occubuísse tráditur.
2. Commemorátio sancti Hermæ, cuius beátus Paulus Apóstolus in epístula ad Romános méminit.
3. In Thebáide, sancti Pachómii, abbátis, qui, adhuc gentílis, testimónio christiánæ caritátis erga mílites in contubérnio deténtos perpúlsus, ad christiánam vitam convérsus, ab anachoréta Palæmone monásticum hábitum accépit et, septem post annos, divíno mónito plúrima ædificávit cœnóbia ad fratres suscipiéndos et præcláram Régulam monachórum scripsit.
4. In Pérside, sanctórum mártyrum trecentórum et decem.
5. Viénnæ in Cìállia Lugdunénsi, sancti Dionysii, epíscopi.
6. Cállii via Flamínia in Picéno Itáliæ, tránsitus sancti Gerúntii, epíscopi Phicoclénsis, qui, e Synodo Romæ celebráta rédiens, ibÍdem nefárie interféctus esse tráditur.
7 *. Vindocíni ad Lígerim flumen in Gállia, sancti Beáti, presbyteri, qui vitam eremíticam egit.
8 *. In monastério Camaldulénsi Fontis Avellánæ in fínibus Umbriæ, beáti Fortis Gabrielli, eremítæ.
9 *. Apud óppidum Montichiéllum in Etrúria, beáti Benincásæ de Monte Politiáno, religiósi ex Ordine Servórum Maríæ, qui in specum montis Amiátæ in agro Senénsi secéssit ibíque vitam pæniténtem egit.
10 *. Londínii in Anglia, beáti Thomæ Pickering, mártyris, mónachi ex Ordine Sancti Benedícti, qui, vir sincéræ simplicitátis et innocentíssimæ vitæ, coniuratiónis in Cárolum regem Secúndum falso insimulátus, æquo ánimo ad Tybúrni patíbulum pro Christo ádiit.
11. In urbe Num-Dinń in Tunquíno, sancti Ioséphi DÖ Quang Hien, presbyteri ex Ordine Prædicatórum et mártyris, qui, in cárcerem trusus, pagános ad Christum convértere et christiános in fide confortáre ínstitit, donec ex decréto imperatóris Thieu Tri decollátus est.
12 *. Monáchii Baváriæ in Germánia, beátæ Maríæ Terésiæ a Iesu (Carolínæ) Gerhardinger, vírginis, quæ Congregatiónem Páuperum Sorórum Scholasticárum Dóminæ Nostræ providentíssima fundávit.
13 *. Intra castra detentiónis Dacháni prope Monáchium Baváriæ in Germánia, beáti Stéphani Grelewski, presbyteri et mártyris, qui, pátria Polónia more militári in bello occupáta, in cárcere a persecutóribus Ecclésiæ diris torméntis extenuátus gloriósam accépit corónam.
Et álibi aliórum plurimórum sanctórum Mártyrum et Confessórum, atque sanctárum Vírginum.
r. Deo grátias.
v. Pretiósa in conspéctu Dómini, (T.P. Allelúia.)
r. Mors sanctórum eius, (T.P. Allelúia.)
r. Mors sanctórum eius, (T.P. Allelúia.)
Lectio brevis (1Cor15,13-14.16-17.20)
Si resurréctio mortuórum non est, neque Christus suscitátus est! Si autem Christus non suscitátus est, inánis est ergo prædicátio nostra, inánis est et fides vestra. Nam si mórtui non resúrgunt, neque Christus resurréxit; quod si Christus non resurréxit, stulta est fides vestra; adhuc estis in peccátis vestris. Nunc autem Christus resurréxit a mórtuis, primítiæ dormiéntium.
Verbum Dómini. r. Deo grátias.
Sancta María et omnes Sancti intercédant pro nobis ad Dóminum, ut nos mereámur ab eo adiuvári et salvári, qui vivit et regnat in sǽcula sæculórum. r. Amen.
Absente sacerdote vel diacono, et in recitatione a solo, sic concluditur:
Dóminus nos benedícat, et ab omni malo deféndat, et ad vitam perdúcat ætérnam. r. Amen.
Et fidélium ánimæ per misericórdiam Dei requiéscant in pace. r. Amen.
v. Ite in pace. r. Deo grátias.
