Die 1 iunii
1. Memória sancti lustíni, mártyris, qui philósophus veram sapiéntiam in Christi veritáte ágnitam íntegre secútus est atque móribus asséruit, assértam dócuit, scriptis propugnávit, morte Romæ complévit sub Marco Aurélio Antoníno imperatóre. Cum enim Apológiam pro religióne christiána imperatóri porrexísset et coram Rústico præfécto tráditus se christiánum proféssus esset, cápite damnátus est.
2. Ibídem, sanctórum Charitónis et Charíti, Evelpísti et lerácis, Pœónis et Liberiáni, mártyrum, qui, eiúsdem lustíni discípuli, simul cum eo gloriósam accepérunt corónam.
3. Alexandríæ in Ægýpto, sanctórum mártyrum Ammónis, Zenónis, Ptolomæi, Ingenis, mílitum, et Theóphili senis, qui, tribunálibus adstántes, cum quidam christiánus, in supplíciis pósitus, trepidáret et iam prope ad negándum declináret, vultu, óculis ac nútibus illum conabántur erígere. Cumque hac de causa clamor totíus pópuli in eos prosilíret, prorumpéntes in médium se christiános esse testáti sunt; per quorum victóriam Christus, qui suis earn ánimi constántiam déderat, gloriosíssime triumphávit.
4. Lycópoli item in Ægýpto, sanctórum mártyrum Ischyriónis, doctóris mílitum, et aliórum quinque mílitum, qui, Arriáno præfécto Ìubénte, sub Décio imperatóre pro Christi fide divérso mortis génere perémpti sunt.
5. Bonóniæ in Æmília, sancti Próculi, mártyris, qui pro christiána veritáte trabálibus clavis transfíxus est.
6. Apud Montem Falcum in Umbria, sancti Fortunáti, presbyteri, qui, ut fertur, assíduo labóre paupéribus pauper et ipse subvénit et vitam suam pro frátribus profúdit.
7. In ínsula Lirinénsi in Província, sancti Caprásii, solitárii, qui cum sancto Honoráto illuc secéssit et vitæ monásticæ inítium dedit.
8 *. Arvérnæ in Aquitánia, sancti Flori, a quo nomen accépit monastérium super eius túmulum elevátum, necnon cívitas atque sedis episcopális.
9 *. In Británnia Minóre, sancti Ronáni, epíscopi, qui ex Hibérnia transfretávit et per silvas vitam duxit eremíticam.
10 *. In agro Licestriénsi in Anglia, sancti Wistáni, mártyris, qui, e régia Merciórum prosápia, cum incestuóso matris regéntis matrimónio obstitísset, tyránni gládio occísus est.
11. Tréviris in Rhenánia Lotharíngiæ, sancti Simeónis, qui, patre græco Syracúsis natus, cum eremíticam vitam apud Béthlehem et in monte Sina duxísset et longe peregrinátus esset, reclúsus demum in turri Nigræ Portæ civitátis óbiit.
12. In monastério Onniénsi in território Burgénsi in Castélla Hispániæ regióne, sancti Enecónis, abbátis, viri pacífici, quem mórtuum ipsi ludæi et Mauri deflevérunt.
13 *. Albæ Pompéiæ in Subalpínis, beáti Theobáldi, qui, amóre paupertátis motus, totam remísit pecúniam víduæ cuídam et, báiulus efféctus humilitáte, ónera aliórum sústulit.
14 *. Urbíni in Picéno Itáliæ, beáti Ioánnis Pelingotto, e Tértio Ordine Sancti Francísci, qui, mercátor, álios magis quam se locupletábat et reclúsus cellam tantum deserébat, ut páuperes et ægrótos adiuváret.
15 *. Londínii in Anglia, beáti Ioánnis Storey, mártyris, qui, iurisperítus, Románo Pontífici fidelíssimus, post cárceres et exsílium propter cathólicam fidem cápite damnátus, Tybúrni per suspéndii cruciátus ad gáudia ætérna transívit.
16 *. Omúræ in Iapónia, beatórum mártyrum Alphónsi Navarrete, ex Ordine Prædicatórum, Ferdinándi a Sancto loseph de Ayala, ex Ordine Eremitárum Sancti Augustíni, presbyterórum, et Leónis Tanaka, religiósi e Societáte Iesu, qui in ódium fídei christiánæ ex edícto suprémi ducis Hidetada simul decolláti sunt.
17 *. In navi servitútis ad áncoram ante portum Rupifórtii in Gállia deligáta, beáti Ioánnis Baptístæ Vernoy de Montjournal, presbyteri et mártyris, qui, canónicus Molinénsis, tempóribus gállicæ perturbatiónis propter sacerdótium ad víncula navália damnátus, tábido morbo conféctus óbiit.
18. In urbe Hong ten in Tunquíno, sancti Ioséphi Túc, mártyris, qui, iúvenis agrícola, cum crucem calcáre recusásset, plúries in custódia cónditus et cruciátus est, dein sub imperatóre Tu Duc cápite truncátus.
19 *. Placéntiæ in Itália, beáti Ioánnis Baptístæ Scalabrini, epíscopi, qui Ecclésiæ huius multímodis óperam navávit, sedulitáte conspícuus erga sacerdótes, agrícolas et operários, sed máxime curam adhíbuit pro migrántibus in Américæ civitátes, pro quibus Pias Societátes a Sacro Corde cóndidit.
20. Messánæ in Sicília Itáliæ, sancti Hanníbalis Maríæ Di Francia, presbyteri, qui Congregatiónes fundávit Rogationistárum a Corde Iesu et Filiárum a Divíno Zelo, ad rogándum Dóminum, ut Ecclésiam suam sanctis sacerdótibus uberáret, et magnam curam in órphanos consúmens manus Dei misericórdes exténdit ad ínopes.
Et álibi aliórum plurimórum sanctórum Mártyrum et Confessórum, atque sanctárum Vírginum.
r. Deo grátias.
v. Pretiósa in conspéctu Dómini, (T.P. Allelúia.)
r. Mors sanctórum eius, (T.P. Allelúia.)
r. Mors sanctórum eius, (T.P. Allelúia.)
Lectio brevis (Eccli 39,6-8)
Iustus cor suum tradet ad vigilándum dilúculo ad Dóminum, qui fecit illum, et in conspéctu Altíssimi deprecábitur. Apériet os suum in oratióne et pro delíctis suis deprecábitur. Si enim Dóminus magnus volúerit, spíritu intellegéntiæ replébitur.
Verbum Dómini. r. Deo grátias.
Sancta María et omnes Sancti intercédant pro nobis ad Dóminum, ut nos mereámur ab eo adiuvári et salvári, qui vivit et regnat in sǽcula sæculórum. r. Amen.
Absente sacerdote vel diacono, et in recitatione a solo, sic concluditur:
Dóminus nos benedícat, et ab omni malo deféndat, et ad vitam perdúcat ætérnam. r. Amen.
Et fidélium ánimæ per misericórdiam Dei requiéscant in pace. r. Amen.
v. Ite in pace. r. Deo grátias.
