Die 11 novembris
1. Memória sancti Martíni, epíscopi, in die eius depositiónis; qui, in Pannónia e paréntibus gentílibus natus et in Gállia sub vexíllis vocátus, adhuc catechúmenus Christum in páuperi veste sua contéxit; baptísmo suscépto, arma relíquit et apud Locogíacum vitam monásticam egit in cœnóbio a seípso cóndito, moderánte sancto Hilário Pictaviénsi; deínde sacerdótio initiátus et epíscopus Turonénsis eléctus, exémplum boni pastóris præ se ferens, ália monastéria parœciásque in vicis fundávit, clerum erudívit ac reconciliávit, rurícolas evangelizávit, donec Condáte ad Dóminum migrávit.
2. Trans lacum Mareótidem in Ægýpto, sancti Mennæ, mártyris.
3. Véntiæ in Província Gálliæ, commemorátio sancti Veráni, epíscopi, qui fílius sancti Euchérii epíscopi Lugdunénsis, in monastério Lirinénsi educáJus, ad sanctum Leónem papam Magnum lítteras scripsit, grátias agens de fide in Verbo incarnáto in epístula eius ad Flaviánum.
4. In província Sárrinii, commemorátio sancti Mennæ, solitárii, cuius virtútes sanctus Gregórius papa Magnus commémorat.
5. Amathúnte in ínsula Cypro, tránsitus sancti Ioánnis Eleemosynárii, Alexandríni epíscopi, misericórdia in páuperes célebris, qui, erga omnes caritáte replétus, ecclésias, valetudinária ac orphanotrophía plúrima exstruénda curávit et máxima sollicitúdine enísus est, ut omnem civitátis leváret misériam, ad hoc ipsum bona Ecclésiæ cónferens et assídue dívites ad erogándam beneficéntiam exhórtans.
6 *. In monastério Malonnénsi in Brabántia, sancti Bertuíni, qui epíscopus et abbas cólitur.
7. Constantinópoli, sancti Theodóri Studítæ, abbátis, qui monastérium suum scholar effécit sapiéntium, sanctórum ac mártyrum, qui in persecutiónibus ab iconoclástis patrátis víctimæ occubuérunt; ter in exsílium pulsus, traditiónes patrum Ecclésiæ magno in honóre hábuit et pro cathólicæ fídei expositióne célebres scripsit Christiánæ doctrínæ institutiónes.
8. In monastério Cryptæ Ferrátæ in agro Tusculáno prope Romam, sancti Bartholomæi, abbátis, qui, in Calábria natus, ad sanctum Nilum ádiit, cuius mox vitam conscrípsit, et ipsi iam moribúndo in Tusculáno cœnóbio sub orientálium ascética disciplína condéndo ádfuit, quod regímine suo roborávit et scholam sciéntiæ artísque effécit.
9. Nagasákii in Iapónia, sanctæ Marínæ de Omúra, vírginis et mártyris, quæ, in víncula coniécta, ludíbrio castimóniæ in públicis obnóxia fuit ac demum igne combústa.
10 *. In óppido Lasbi Piasnica apud civitátem Wejheromo in Polónia, beátæ Alíciæ Kotowska, vírginis e Congregatióne Sorórum Resurrectiónis Dómini et mártyris, quæ in bello ob Christi fidem strénue servátam plumbis interfécta est.
11 *. Sóphiæ in Bulgária, pássio beáti Vincéntii Eugénii Bossilkov, epíscopi Nicopolitáni et mártyris, e Congregatióne Passiónis Iesu, qui sub tyránnico regímine, cum se a romána communióne seiúngere recusáret, ad cárcerem ductus et dire vexátus sub crímine perduelliónis cápiti damnátus est et plumbis necátus.
Et álibi aliórum plurimórum sanctórum Mártyrum et Confessórum, atque sanctárum Vírginum.
r. Deo grátias.
v. Pretiósa in conspéctu Dómini, (T.P. Allelúia.)
r. Mors sanctórum eius, (T.P. Allelúia.)
r. Mors sanctórum eius, (T.P. Allelúia.)
Lectio brevis (Eccli 45,19-21)
Factum est illi in testaméntum ætérnum et sémini eius sicut dies cæli: ministráre illi et fungi sacerdótio et benedícere pópulum suum in nómine eius. Ipsum elégit ab omni vivénte offérre sacrifícium Deo, incénsum et ádipes et incéndere bonum odórem et memoriále et placáre pro pópulo suo. Et dedit illi in præcéptis suis potestátem, in testaméntis iudiciórum: docére Iacob testimónia et in lege sua lucem dare Israel.
Verbum Dómini. r. Deo grátias.
Sancta María et omnes Sancti intercédant pro nobis ad Dóminum, ut nos mereámur ab eo adiuvári et salvári, qui vivit et regnat in sǽcula sæculórum. r. Amen.
Absente sacerdote vel diacono, et in recitatione a solo, sic concluditur:
Dóminus nos benedícat, et ab omni malo deféndat, et ad vitam perdúcat ætérnam. r. Amen.
Et fidélium ánimæ per misericórdiam Dei requiéscant in pace. r. Amen.
v. Ite in pace. r. Deo grátias.
