Die 18 novembris
1. Dedicátio basilicárum Sanctórum Petri et Pauli, Apostolórum, quarum prior, a Constantíno imperatóre in colle Vaticáno ædificáta, super sepúlcrum sancti Petri, sed vetustáte collábens, in amplióre forma restitúta, hac ipsa recurrénte die dénuo consecráta est; áltera vero via Ostiénsi, a Theodósio et Valentiniáno imperatóribus exstrúcta, dein miserándo incéndio consúmpta ac pénitus reædificáta, die décima decémbris dedicáta est. Quarum commúni commemoratióne fratérnitas Apostolórum unitásque Ecclésiæ quodámmodo significátur.
2. Antiochíæ in Syria, sancti Románi, mártyris, qui, Ecclésiæ Cæsariénsis diáconus, cum in persecutióne Diocletiáni imperatóris christiános normis decretórum parére vidísset et ad idolórum simulácra properáre liberáque voce ad resisténdum excitavísset, post dira torménta et abscissiónem linguæ, in cárcere láqueo strangulátus, célebri martyrio coronátus est.
3 *. Columbáriis in pago Bituricénsi Aquitániæ, sancti Pátrocli, presbyteri, qui eremíta et missionárius éxstitit.
4 *. In Británnia Minóre, sancti Maudéti, abbátis, qui in desérta ínsula vitam duxit monásticam et, magíster vitæ spiritális, plures sanctos in númerum discipulórum congregávit.
5 *. Constántiæ in Néustria, sancti Romachárii, epíscopi.
6 *. In pago Velláico Aquitániæ, sancti Theofrédi, abbátis et mártyris.
7. Turónis in Néustria, tránsitus sancti Odónis, abbátis Cluniacénsis, qui observántiam monásticam iuxta Régulam sancti Benedícti et disciplínam sancti Benedícti Anianénsis instaurávit.
8 *. Nagasákii in Iapónia, beatórum mártyrum Leonárdi Kimura, religiósi e Societáte Iesu, Andréæ Murayama Tokuan, Cosmæ Takeya, Ioánnis Yoshida Shoun, Domínici Jorge, qui pro christiáno nómine igne cremáti sunt.
9. In urbe Sancto Cárolo in Missúria e Civitátibus Fœderátis Américæ Septemtrionális, sanctæ Philippínæ Duchesne, vírginis e Soróribus a Sacro Corde Iesu, quæ, in Gállia nata, perturbatióne in pátria sæviénte, communitátem religiósam aggregávit et in Américam tránsiens multas scholas instítuit.
10 *. Fabratériæ apud Frusinónem in Itália, beáti Grimoáldi a Purificatióne (Ferdinándi) Santamaria, religiósi e Congregatióne Passiónis, qui, dum fervóre et gáudio ad sacerdótium se parábat, morbo corréptus pie óbiit.
11 *. In vico Wal-Ruda in Polónia, beátæ Carolínæ Kózka, vírginis et mártyris, quæ, bello flagránte, cum a mílite castitátem suam deféndere voluísset, ense concússa adhuc aduléscens pro Christo occúbuit.
12 *. Apud Matrítum in Hispánia, beatórum Maríæ a Refúgio (Maríæ Gabriélæ) Hinojosa y Naveros et quinque sociárum, vírginum ex Ordine Visitatiónis Sanctæ Maríæ et mártyrum, quæ, persecutióne sæviénte, in monastérium reclúsæ, sed dolóse a militiánis apprehénsæ, plumbis cæsæ ad Christum Sponsum migravérunt.
Quarum nomina: beatæ Teresia Maria (Laura) Cavestány y Anduaga, losepha Maria (Maria del Carmen) Barrera y Izaguirre, Maria Agnes (Agnes) Zudaire y Galdeano, Maria Angela (Martina) Olaizola y Garagarza, Maria Engratia (losepha loachima) Lecuona y Aramburú.
Et álibi aliórum plurimórum sanctórum Mártyrum et Confessórum, atque sanctárum Vírginum.
r. Deo grátias.
v. Pretiósa in conspéctu Dómini, (T.P. Allelúia.)
r. Mors sanctórum eius, (T.P. Allelúia.)
r. Mors sanctórum eius, (T.P. Allelúia.)
Lectio brevis (Eccli 44,2.13-15)
Multam glóriam fecit Dóminus, magnificéntiam suam a sǽculo. Usque in ætérnum manet semen eórum, et glória eórum non derelinquétur. Córpora ipsórum in pace sepúlta sunt, et nomen eórum vivit in generatiónem et generatiónem; sapiéntiam ipsórum narrent pópuli, et laudem eórum núntiet ecclésia.
Verbum Dómini. r. Deo grátias.
Sancta María et omnes Sancti intercédant pro nobis ad Dóminum, ut nos mereámur ab eo adiuvári et salvári, qui vivit et regnat in sǽcula sæculórum. r. Amen.
Absente sacerdote vel diacono, et in recitatione a solo, sic concluditur:
Dóminus nos benedícat, et ab omni malo deféndat, et ad vitam perdúcat ætérnam. r. Amen.
Et fidélium ánimæ per misericórdiam Dei requiéscant in pace. r. Amen.
v. Ite in pace. r. Deo grátias.
