Die 25 novembris
1. Sanctæ Catharínæ, quam vírginem fuísse Alexandrínam et mártyrem narrátur, ingénii acúmine et sapiéntia non minus quam ánimi róbore refértam. Eius corpus in célebri cœnóbio in monte Sina pia cólitur veneratióne.
2. Cæsaréæ in Cappadócia, sancti Mercúrii, mártyris.
3. Romæ, commemorátio sancti Móysis, presbyteri et mártyris, qui, sancto Fabiáno papa sub Décio imperatóre interémpto, una cum presbyterórum collégio curam fratrum in Ecclésia egit; pacem lapsis infírmis et in éxitu constitútis dandam iudicávit et, in cárcere diu deténtus, sæpe per sancti Cypriáni Carthaginénsis lítteras eos consolátus, exímio et admirábili martyrio coronátus est.
4. Alexandríæ in Ægýpto, sancti Petri, epíscopi et mártyris, qui, ómnibus virtútibus exornátus, repénte, Galérii Maximiáni imperatóris iussu cápite obtruncátus, magnæ persecutiónis última víctima et sigíllum mártyrum éxstitit. Cum eo commemorántur epíscopi tres ægyptii, scílicet Hesychius, Pachómius et Theodórus, cum multis áliis, qui, item Alexandríæ in eádem persecutióne passi sunt, gládio crudéli ad cælum evécti.
5. In Numídia, sancti Márculi, epíscopi, qui, ut fertur, Constántis imperatóris témpore, a Macário quodam e rupe præcipitátus martyr occúbuit.
6 *. In agro Agennénsi in Aquitánia, sancti Mauríni, mártyris, qui, ad plebem rurálem evangelizándam incúmbens, a pagánis trucidátus esse tráditur.
7 *. In pago Gálliæ Valentinénsi, beátæ Beatrícis de Ornacieux, vírginis ex Ordine Cartusiénsi, quæ, amóre Crucis insígnis, in cœnóbio Emoscénsi, quod condíderat, in extréma paupertáte vixit et óbiit.
8. Ruéthis in Suévia, beátæ Elísabeth Achler, cognoménto Bonæ, vírginis, quæ, in Tértio Ordine Regulári Sancti Francísci quasi reclúsa vivens, humilitátem, paupertátem corporísque afflictiónem mirífice cóluit.
9. Seuli in Coréa, sancti Petri Yi Ho-yóng, mártyris, qui, catechísta, una cum soróre sancta Agatha Yi So-sa a satellítibus captus, cum in confessióne fídei firmus permansísset, ter confráctis ei óssibus, quáttuor annos in cárcere deténtus est, ubi primus gloriósi ágrriinis mártyrum huius natiónis óbiit.
10 *. In vico Puebla de Htynr prope Terúlium in Hispánia, beáti Hyacínthi Serrano López, presbyteri ex Ordine Prædicatórum et mártyris, in persecutióne erga Ecclésiam plumbis transfóssi. Cum eo commernorátur beátus martyr lacóbus Meseguer Burillo, présbyter ex eódem Ordine, qui pro Christo Barcinóne ignóto die egrégium perégit certámen.
Et álibi aliórum plurimórum sanctórum Mártyrum et Confessórum, atque sanctárum Vírginum.
r. Deo grátias.
v. Pretiósa in conspéctu Dómini, (T.P. Allelúia.)
r. Mors sanctórum eius, (T.P. Allelúia.)
r. Mors sanctórum eius, (T.P. Allelúia.)
Lectio brevis (Eccli 44,2.13-15)
Multam glóriam fecit Dóminus, magnificéntiam suam a sǽculo. Usque in ætérnum manet semen eórum, et glória eórum non derelinquétur. Córpora ipsórum in pace sepúlta sunt, et nomen eórum vivit in generatiónem et generatiónem; sapiéntiam ipsórum narrent pópuli, et laudem eórum núntiet ecclésia.
Verbum Dómini. r. Deo grátias.
Sancta María et omnes Sancti intercédant pro nobis ad Dóminum, ut nos mereámur ab eo adiuvári et salvári, qui vivit et regnat in sǽcula sæculórum. r. Amen.
Absente sacerdote vel diacono, et in recitatione a solo, sic concluditur:
Dóminus nos benedícat, et ab omni malo deféndat, et ad vitam perdúcat ætérnam. r. Amen.
Et fidélium ánimæ per misericórdiam Dei requiéscant in pace. r. Amen.
v. Ite in pace. r. Deo grátias.
