Die 8 septembris
1. Festum Nativitátis beátæ Maríæ Vírginis, ex sémine Abrahæ, de tribu luda ortæ, ex progénie regis David, e qua Fílius Dei natus est, factus homo de Spíritu Sancto, ut hómines vetústa servitúte peccáti liberáret.
2. Romæ, commemorátio sancti Hadriáni, mártyris, qui Nicomedíæ in Bithynia passus est et in cuius honóre Honórius papa Primus Senátus Románi cúriam in ecclésiam convértit.
3. Alexandríæ in Ægýpto, sanctórum Fausti, Dii et Ammónii, presbyterórum et mártyrum, qui in persecutióne Diocletiáni imperatóris cum sancto Petro epíscopo martyrii corónam accepérunt.
4. In civitáte Bagreeand in Arménia Maióre, sancti Isaac, epíscopi, qui ad vitam christiánam pópuli fovéndam Sacram Scriptúram atque Litúrgiam in arménum sermónem vertit; fídei in Synodo Ephesína confirmátæ adhæsit, sed mox sede pulsus exsul óbiit.
5. Romæ apud sanctum Petrum, deposítio sancti Sérgii papæ Primi, génere syri, qui magnam impéndit óperam in Sáxonum Frisonúmque evangelizatiónem et multas compósuit controvérsias ac lites, mori éligens quam erróribus consentíre.
6. Frisíngæ in Bavária, sancti Corbiniáni, qui, epíscopus ordinátus et ad prædicándum Evangélium in Baváriam missus, úberes fructus rétulit.
7 *. Piperáci in Aniciénsi território Gálliæ, sancti Petri de Chavanon, presbyteri, qui, ad perfectiórem vitam aspírans, in illum recéssum se ábdidit, ubi cœnóbium Canonicórum Regulárium ædificávit, cui étiam præpósitus est.
8 *. Pisáuri in Picéno Itáliæ, beátæ Seraphínæ Sforza, quæ in vita coniugáli plures expérta est adversitátes et, vídua effécta, sub Régula sanctæ Claræ réliquos vitæ annos humíllime transégit.
9. Valéntiæ in Hispánia, sancti Thomæ de Villanóva, epíscopi, qui, eremíta sub Régula sancti Augustíni, cum episcopále munus ex obœdiéntia suscepísset, inter álias pastoráles virtútes tarn flagránti amóre páuperum excélluit, ut ómnia pro egénis dispérderet, ne léctulum quidem sibi relínquens.
10 *. Dunélmi in Anglia, beatórum mártyrum Thomæ Palaser, presbyteri, Ioánnis Norton et Ioánnis Talbot, qui, sub Elísabeth regína Prima cápite damnáti, primus quod sacérdos in Angliam revérsus esset, álii ob auxílium ipsi sufféctum, patíbuli cruciátus passi sunt.
11. Carthágine Nova in Colúmbia, natális sancti Petri Claver, presbyteri, cuius memória cras ágitur.
12 *. Nagasákii in Iapónia, beatórum Antónii a Sancto Bonavéntura, ex Ordine Fratrum Minórum, Domínici Castellet, ex Ordine Prædicatórum, presbyterórum, et vigínti sociórum, mártyrum, quorum céteri láici et plures infántes, qui omnes vel per ensem ve1 per ignem pro Christo martyrium subiérunt.
Quorum nomina: beati Dominicus de Nagasakio, religiosus ex Ordine Fratrum Minorum; Thomas a Sancto Hyacintho et Antonius a Sancto Dominico, religiosi ex Ordine Prædicatorum; Lucia Ludovica, vidua; Ioannes Tomachi et filii eius Dominicus, Michael, Thomas et Paulus; Ioannes Imamura, Paulus Sadayu Aybara, Romanus Aybara et filius eius Leo, lacobus Hayashida, Matthæus Alvarez, Michael Yamada et filius eius Laurentius, Ludovicus Higashi et filii eius Franciscus et Dominicus.
13 *. Massíliæ in Gállia, tránsitus beáti Frideríci Ozanam, qui, vir eruditióne et pietáte clarus, eminénti sua doctrína veritátes fídei deféndit ac propagávit, in Societáte a sancto Vincéntio de Paul nuncupáta assíduam caritátem paupéribus præbuit et, paterfamílias exímius, famíliam fecit domésticam ecclésiam.
14 *. Almériæ ad litus Vandalíciæ Hispániæ regiónis, beatórum Ioséphi Cæcílii (Bonifátii) Rodríguez González, Theodemíri Ióachim (Hadriáni) Sainz Sainz et Evéntii Richárdi (Eusébii Alphónsi) Urjurra, mártyrum, qui, Fratres Scholárum Christianárum, témpore belli civílis ob persecutiónem religiósam palmam mártyrum adépti sunt.
15 *. In vico Alcoy prope Lucéntum item in Hispánia, beáti Maríni Blanes Giner, mártyris, qui, paterfamílias, témpore eiúsdem persecutiónis, ab homínibus mortem, a Deo vero vitam ætérnam accépit.
16 *. In civitáte Paterna in pago Valentíno item in Hispánia, beáti Ismǽlis Escrihuela Esteve, mártyris, qui, paterfamílias, per martyrium victóriæ Christi párticeps factus est.
17 *. Villæ Regális Infántum in pago Castellionénsi item in Hispánia, beáti Paschális Fortuño Almela, presbyteri ex Ordine Fratrum Minórum et mártyris, qui ob Christi testimónium coronátus est.
18 *. In civitáte Buñol prope Valéntiam item in Hispánia, beatórum Ioséphæ a Sancto Ioánne a Deo Ruano García et Maríæ a Dolóribus a Sancta Eulália Puig Bonany, vírginum e Congregatióne Sorórum Senum Derelictórum et mártyrum, quæ in eádem persecutióne erga fidem corónam glóriæ, effúso sánguine, accepérunt.
19 *. Prope Monáchium Baváriæ in Germánia intra castra detentiónis Dacháni, beáti Adámi Bargielski, presbyteri et mártyris, qui in bello sponte pro párocho suo fídei hóstibus se trádidit et in cárcere dira perpéssus ad ætérnam glóriam invíctus migrávit.
20 *. Apud locum Grofi-Rosen in Germánia, beáti Ladislái B1qdziński, presbyteri e Congregatióne Sancti Michǽlis et mártyris, qui in eádem tempestáte ab inimícis Ecclésiæ e pátria Polónia in fodínis lápidis deportátus est ibíque necátus.
Et álibi aliórum plurimórum sanctórum Mártyrum et Confessórum, atque sanctárum Vírginum.
r. Deo grátias.
v. Pretiósa in conspéctu Dómini, (T.P. Allelúia.)
r. Mors sanctórum eius, (T.P. Allelúia.)
r. Mors sanctórum eius, (T.P. Allelúia.)
Lectio brevis (Gen 17,16.19)
Benedícam ei; et ex illa quoque dabo tibi fílium. Benedictúrus sum eam, erítque in natiónes; reges populórum oriéntur ex ea”. Constítuam pactum meum illi in fœdus sempitérnum et sémini eius post eum.
Verbum Dómini. r. Deo grátias.
Sancta María et omnes Sancti intercédant pro nobis ad Dóminum, ut nos mereámur ab eo adiuvári et salvári, qui vivit et regnat in sǽcula sæculórum. r. Amen.
Absente sacerdote vel diacono, et in recitatione a solo, sic concluditur:
Dóminus nos benedícat, et ab omni malo deféndat, et ad vitam perdúcat ætérnam. r. Amen.
Et fidélium ánimæ per misericórdiam Dei requiéscant in pace. r. Amen.
v. Ite in pace. r. Deo grátias.
