Die 17 septembris
1. Sancti Robérti Bellarmino, epíscopi et Ecclésiæ doctóris, e Societáte Iesu, qui præcláre de theológicis témporis sui controvérsiis peculiári ac subtíli hábitu disputávit; cardinális renuntiátus, ad ministérium pastorále in Ecclésia Capuána magnópere sese impéndit et tandem Romæ ad Apostólicæ Sedis et fídei doctrínæ defensiónem plúrimos suscépit labóres.
2. In monastério Montis Sanctis Rupérti prope Bíngium in Hássia, sanctæ Hildegárdis Bingénsis, vírginis et Ecclésiæ doctóris, quæ, sciéntia rerum natúræ et medicínæ necnon arte música períta, quam mýstica contemplatióne expérta erat, pie in libris expósuit ac descrípsit.
3. Medioláni in Ligúria, deposítio sancti Sátyri, cuius insígnia merita sanctus Ambrósius, frater eius, commémorat. Nondum Christi initiátus mystériis, cum in naufrágium incidísset, mortem non métuit, sed, ne vácuus mystériis exíret e vita, ex undis servátus Dei Ecclésiam requisívit; quem íntima et mútua cáritas fratri Ambrósio coniúnxit, a quo iuxta sanctum mártyrem Victórem sepúltus est.
4. Leódii in Austrásia, pássio sancti Lambérti, epíscopi Traiecténsis et mártyris, qui, exsílio afféctus, in monastérium Stabulénse se recépit; póstea, sede restitúta, múnere pastoráli egrégie perfúnctus est et ab ínvidis ínnocens occísus.
5 *. In silva Argonnénsi ad Mosam flumen in Austrásia, sancti Rodíngi, abbátis, qui monastérium Belli Loci cóndidit piéque rexit.
6. Córdubæ in Vandalícia Hispániæ regióne, sanctæ Colúmbæ, vírginis et mártyris, quæ in Maurórum persecutióne sponte coram iúdice et sátrapum collegio fidem proféssa est et contínuo ante fores palátii gládio decolláta est.
7 *. Melínæ intra fines Andegavénses in Gállia, sancti Regináldi, eremítæ, qui in silvam Cratumnénsem se cóntulit ad præcépta Dómini plénius adimplénda.
8. In monastério Montis Sancti Rupérti prope Bíngium in Hássia, sanctæ Hildegárdis, vírginis, quæ, sciéntia rerum natúræ et medicínæ necnon arte música períta, quam mystica contemplatióne expérta erat, pie in libris expósuit ac descrípsit.
9 *. Aviliánæ in território Taurinénsi in Subalpínis, beáti Cherubíni Testa, presbyteri ex Ordine Eremitárum Sancti Augustíni, erga domínicam Passiónem devotíssimi.
10. Cæsaraugústæ in Aragónia Hispániæ, sancti Petri de Arbués, presbyteri et mártyris, qui, canónicus reguláris ex Ordine Sancti Augustíni, in Aragóniæ regno contra superstitiónes ac h reses incúbuit et ab inquisítis quibúsdam ante altáre ecclésiæ cathedrális percússus cécidit.
11. Huéi in Annámia, sancti Emmanuélis Nguyen Văn Trieu, presbyteri et mártyris, sub regímine dómini Cånh Thinh.
12. Génuæ in Ligúria, sancti Francísci Maríæ de Camporósso, religiósi ex Ordine Fratrum Minórum Capuccinórum, caritáte in páuperes insígnis, qui, peste grassánte, pro salúte proximórum ipse morbo corréptus víctimam se óbtulit.
13 *. Cracóviæ in Polónia, beáti Sigismúndi Felícis Feliński, epíscopi Varsaviénsis, qui summas inter ærúmnas pro Ecclésiæ libertáte et instauratióne adlaborávit ac pro ómnibus pópuli necessitudínibus Institútum Sorórum Franciscálium Famíliæ Maríæ fundávit.
14 *. In vico Castillo de Uillamalefa prope Castáliam in Hispánia, beáti Ioánnis Ventura Solsona, presbyteri et mártyris, qui, persecutióne sæviénte, constántia fídei invíctus ad cæléstem glóriam migrávit.
15 *. Matríti item in Hispánia, beáti Timóthei Valero Pérez, presbyteri e Tértio Ordine Sancti Francísci Capulatórum a beáta Vírgine Perdolénti et mártyris, qui in eádem tempestáte pro Christo egrégium perégit certámen.
16 *. In silva Palmiry prope Varsáviam in Polónia, beáti Sigismúndi Sajna, presbyteri et mártyris, qui, belli témpore, ob fidem coram aliéno regímine in Deum hostíli mínime abdicátam plumbis transfóssus est.
Et álibi aliórum plurimórum sanctórum Mártyrum et Confessórum, atque sanctárum Vírginum.
r. Deo grátias.
v. Pretiósa in conspéctu Dómini, (T.P. Allelúia.)
r. Mors sanctórum eius, (T.P. Allelúia.)
r. Mors sanctórum eius, (T.P. Allelúia.)
Lectio brevis (Iac 5, 8-11)
Patiéntes estóte, et vos, confirmáte corda vestra, quóniam advéntus Dómini appropinquávit. Nólite ingemíscere fratres, in altérutrum, ut non iudicémini; ecce iudex ante iánuam assístit. Exémplum accípite, fratres, labóris et patiéntiæ prophétas, qui locúti sunt in nómine Dómini. Ecce beatificámus eos, qui sustinuérunt; sufferéntiam Iob audístis et finem Dómini vidístis, quóniam miséricors est Dóminus et miserátor.
Be you therefore also patient, and strengthen your hearts: for the coming of the Lord is at hand. Grudge not, brethren, one against another, that you may not be judged. Behold the judge standeth before the door. Take, my brethren, for an example of suffering evil, of labour and patience, the prophets, who spoke in the name of the Lord. Behold, we account them blessed who have endured. You have heard of the patience of Job, and you have seen the end of the Lord, that the Lord is merciful and compassionate.
Verbum Dómini. r. Deo grátias.
Sancta María et omnes Sancti intercédant pro nobis ad Dóminum, ut nos mereámur ab eo adiuvári et salvári, qui vivit et regnat in sǽcula sæculórum. r. Amen.
Absente sacerdote vel diacono, et in recitatione a solo, sic concluditur:
Dóminus nos benedícat, et ab omni malo deféndat, et ad vitam perdúcat ætérnam. r. Amen.
Et fidélium ánimæ per misericórdiam Dei requiéscant in pace. r. Amen.
v. Ite in pace. r. Deo grátias.
