Die 1 octobris
1. Memória sanctæ Terésiæ a Iesu Infánte, vírginis et Ecclésiæ doctóris, quæ, monastérium Carmelitárum Lexoviénse in Gállia adhuc adulescéntula ingréssa, innocéntia ac simplicitáte vitæ magístra sanctitátis in Christo effécta, viam ad christiánam perfectiónem per spiritálem infántiam dócuit atque in animárum salútem et Ecclésiæ increméntum omnem mysticam sollicitúdinem infúdit, vitam consúmmans vicésimo quinto ætátis suæ anno. Obiit vero die trigésima septémbris.
2. Sacilínii in Gállia Bélgica, sancti Piatónis, qui présbyter, evangelizátor Tornacénsium et martyr cólitur.
3. Ulyssipóne in Lusitánia, sanctórum Veríssimi, Máximæ et Iúliæ, mártyrum.
4. Constantinópoli, sancti Románi, diáconi, qui, ex sublími arte in hymnis ecclesiásticis in honórem Dómini atque sanctórum componéndis, Melódus, cognominári méruit.
5. Tréviris in Rhenánia Austrásiæ, sancti Nicétii, epíscopi, qui, teste sancto Gregório Turonénsi, fortis in prædicándo, terríbilis in arguéndo, constans in docéndo, sub Clotário rege Francórum exsílio afféctus est.
6. Gandávi in Flándria Néustriæ, sancti Bavónis, mónachi, qui sancti Amándi discípulus fuit et, sǽculo valedícens, distribútis bonis paupéribus, in monastérium hoc in castro cónditum se cóntulit.
7 *. Condáte ad Scaldim in Hannónia Austrásiæ, sancti Wasnúlphi, mónachi, pátria scoti.
8. Cantuáriæ in Anglia, sancti Geráldi Edwards, presbyteri et mártyris, qui, in Gállia ordinátus et in pátriam, persecutióne Elísabeth regínæ Primæ furénte, revérsus, post diútinum cárcerem patíbulo martyrium complévit. Simul cum eo passi sunt beáti Robértus Wilcox et Christóphorus Buxton, presbyteri, item propter sacerdótium, et Robértus Widmerpool, quod sacerdóterri adiuvísset.
9 *. Cicéstriæ item in Anglia, beatórum Radúlphi Crockett et Eduárdi James, presbyterórum et mártyrum, qui, ex Collégio Anglórum Reménsi in pátriam regréssi, propter solum sacerdótium ad patíbuli supplícia ducti sunt.
10 *. Gippevíci item in Anglia, beáti Ioánnis Robinson, presbyteri et mártyris, qui, paterfamílias, uxóre defúncta, propter sacerdótium in summa senectúte suscéptum martyrio coronátus est.
11 *. Nagasákii in Iapónia, beatórum Gásparis Hikojiro et Andréæ Yoshida, mártyrum, qui, catechístæ, cum sacerdótes domi suscepíssent, cápitis detruncatiónem subiérunt.
12 *. Sarónni prope Varésium in Langobárdia Itáliæ, beáti Aloysii Maríæ Monti, religiósi, qui, etsi condiciónem servans laicálem, Fílios ab Immaculáta Conceptióne instítuit, quos in spíritu caritátis erga páuperes et egénos diréxit, præsértim infírmis orphanísque assidéndo et iúvenum institutióni cavens.
13 *. In vico Rotglá y Corbera in pago Valentíno Hispániæ, beátæ Floréntiæ Caerols Martínez, vírginis et mártyris, quæ, témpore persecutiónis erga fidem, per martyrium vitæ ætérnæ glóriam cónsequi méruit.
14. In vico Villena in eódem pago Hispániæ, beáti Alvári Sanjuán Canet, presbyteri e Societáte Salesiána et mártyris, qui in eádem tempestáte per agónem certáminis ad palmam copiósam est ductus.
15 *. Prope Monáchium Baváriæ in Germánia, beáti Antónii Rewera, presbyteri et mártyris, qui, e Polónia in castra detentiónis Dacháni propter Christi confessiónem cónditus, per torménta ad corónam martyrii pervénit.
Et álibi aliórum plurimórum sanctórum Mártyrum et Confessórum, atque sanctárum Vírginum.
r. Deo grátias.
v. Pretiósa in conspéctu Dómini, (T.P. Allelúia.)
r. Mors sanctórum eius, (T.P. Allelúia.)
r. Mors sanctórum eius, (T.P. Allelúia.)
Lectio brevis (Sap 4,1-2)
Mélius est absque líberis esse cum virtúte; immortálitas est enim in memória illíus, quóniam et apud Deum nota est et apud hómines. Cum præsens est, imitántur illam; et desíderant eam, cum se edúxerit; et in perpétuum coronáta triúmphat, incoinquinatórum certáminum prǽmium vincens.
Verbum Dómini. r. Deo grátias.
Sancta María et omnes Sancti intercédant pro nobis ad Dóminum, ut nos mereámur ab eo adiuvári et salvári, qui vivit et regnat in sǽcula sæculórum. r. Amen.
Absente sacerdote vel diacono, et in recitatione a solo, sic concluditur:
Dóminus nos benedícat, et ab omni malo deféndat, et ad vitam perdúcat ætérnam. r. Amen.
Et fidélium ánimæ per misericórdiam Dei requiéscant in pace. r. Amen.
v. Ite in pace. r. Deo grátias.
