Die 25 augusti
1. Sancti Ludovíci Noni, quem, regem Gálliæ, vel domi vel belli in christianórum defensiónem gesti actuósa fides, iustítia in regéndo, amor in páuperes et constántia in advérsis illustravérunt. Matrimónio contrácto, úndecim hábuit fílios, quos óptime piéque educávit. In coléndam vero crucem, corónam ac sepúlcrum Dómini opes virésque et ipsam vitam impéndit, donec peste corréptus in castris apud Tunétem ad oram Africæ septemtrionális óbiit.
2. Sancti Ioséphi de Calasanz, presbyteri, qui ad erudiéndos púeros atque adulescéntes in amóre et sapiéntia Evangélii scholas populáres instítuit Ordinémque Clericórum Regulárium Páuperum Matris Dei Scholárum Piárum Romæ fundávit.
3. Areláte in Província, sancti Genésii, mártyris, qui, adhuc catechúmenus, exceptóris offício fungens, cum contra christiános ágere recusavísset, fuga salútem petívit, sed a milítibus comprehénsus próprio cruóre baptizátus est.
4. Itálicæ prope Híspalim in Bǽtica Hispániæ, sancti Gerúntii, epíscopi, qui in cárcere tráditur obiísse.
5 *. Agathæ in Gállia Narbonénsi, sancti Sevéri, abbátis monastérii ab ipso in hac urbe cónditi.
6. Constantinópoli, sancti Menæ, epíscopi, qui a sancto Agapíto papa ordinátus, communióne intérdum suspénsa cum Vigílio papa reconciliáta, magnam ecclésiam ab imperatóre lustiniáno ædificátam divínæ Sóphiæ dedicávit.
7 *. Attáni in pago Lemovicénsi Aquitániæ, sancti Arédii, abbátis, qui pro cœnóbio, quod fundáverat, sapiéntem régulam compósuit e præcéptis haustam variórum monásticæ vitæ institutórum.
8. Ultraiécti in Géldria Austrásiæ, sancti Gregórii, abbátis, qui adhuc aduléscens sanctum Bonifátium ad Hássiæ et Thuríngiæ conversiónem pergéntem contínuo secútus est, dein de ipsíus mandáto monastérium Sancti Martini abbas rexit et Ecclésiam Ultraiecténsem gubernávit.
9. Apud Montem Faliscórum in Túscia, tránsitus sancti Thomæ Cantelupe, epíscopi Herefordiénsis in Anglia, qui, eruditióne clarus, in se sevérum, erga páuperes vero largitórem muníficum se exhíbuit.
10 *. Scimabáræ in Iapónia, beatórum mártyrum Michǽlis Carvalho, e Societáte Iesu, Petri Vázquez, ex Ordine Prædicatórum, Ludovíci Sotelo et Ludovíci Sasanda, presbyterórum, atque Ludovíci Baba, religiósi ex Ordine Fratrum Minórum, qui pro Christi fide vivi combústi sunt.
11 *. In fœda actuária in salo constitúta ante oram Rupifórtii in Gállia, beáti Pauli Ioánnis Charles, presbyteri et mártyris, qui, prior Cisterciénsis, gállica perturbatióne sæviénte, a sectatóribus propter sacerdótium de monastério Septem Fóntium ad navália víncula ablátus, inédia morbóque corréptus occúbuit.
12 *. Córdubæ in Argentína, beátæ Maríæ a Tránsitu Iesu Sacraménti, vírginis, quæ christiánæ institutióni páuperis derelictæque infántiæ summam dedit óperam et Soróres missionárias e Tértio Ordine Sancti Francísci in Argentína instítuit.
13 *. Valéntiæ in Hispánia, beáti Aloysii Urbano Lanaspa, presbyteri ex Ordine Prædicatórum et mártyris, qui pro Christo egrégium perégit certámen.
Et álibi aliórum plurimórum sanctórum Mártyrum et Confessórum, atque sanctárum Vírginum.
r. Deo grátias.
v. Pretiósa in conspéctu Dómini, (T.P. Allelúia.)
r. Mors sanctórum eius, (T.P. Allelúia.)
r. Mors sanctórum eius, (T.P. Allelúia.)
Lectio brevis (Eccli 44,2.13-15)
Multam glóriam fecit Dóminus, magnificéntiam suam a sǽculo. Usque in ætérnum manet semen eórum, et glória eórum non derelinquétur. Córpora ipsórum in pace sepúlta sunt, et nomen eórum vivit in generatiónem et generatiónem; sapiéntiam ipsórum narrent pópuli, et laudem eórum núntiet ecclésia.
Verbum Dómini. r. Deo grátias.
Word of the Lord. r. Let us give thanks to God.
Sancta María et omnes Sancti intercédant pro nobis ad Dóminum, ut nos mereámur ab eo adiuvári et salvári, qui vivit et regnat in sǽcula sæculórum. r. Amen.
May Saint Mary and all the Saints intercede for us with the Lord, that we may deserve to be helped and saved by him who lives and reigns for ever and ever. r. Amen.
Absente sacerdote vel diacono, et in recitatione a solo, sic concluditur:
In the absence of a deacon or a priest, and in the recitation alone, it is concluded thus:
Dóminus nos benedícat, et ab omni malo deféndat, et ad vitam perdúcat ætérnam. r. Amen.
May the Lord bless us, forbid us from all evil, and bring us to eternal life. r. Amen.
Et fidélium ánimæ per misericórdiam Dei requiéscant in pace. r. Amen.
And may their souls rest in peace through the mercy of God. r. Amen.
v. Ite in pace. r. Deo grátias.
v. Go in peace. r. Let us give thanks to God.
The translations proposed here have the sole purpose of a better understanding of the Latin text. They are not to be used in place of the official translations in the liturgy in the vernacular.
