Die 29 augusti
1. Memória passiónis sancti Ioánnis Baptístæ, quem Heródes Antípas rex in arce Macheróntis in cárcere ténuit et in anniversário suo, fília Herodíadis rogánte, decollári præcépit; ídeo, Præcúrsor Dómini, sicut lucérna ardens et lucens, tam in morte quam in vita testimónium perhíbuit veritáti.
2. Apud Sírmium in Pannónia, sanctæ Basíllæ.
3. Romæ, commemorátio sanctæ Sabínæ, cuius títulus in Aventíno cónditus eius nomen præbet venerándum.
4. Metis in Gállia Bélgica, sancti Adélphi, epíscopi.
5 *. In pago Nanneténsi Británniæ Minóris, sancti Victóris, solitárii, qui in parvo oratório ab ipso exstrúcto apud Campum Bonum reclúsus vixit.
6. Londínii in Anglia, commemorátio sancti Sebbi, qui, rex Sáxonum orientálium Deo devotíssimus, regno depósito, in monástico hábitu, quem diu desideráverat, obíre vóluit.
7. Parísiis in Néustria, sancti Mederíci, presbyteri et abbátis Augustodunénsis, qui in recéssu prope civitátem vixit.
8 *. Valéntiæ in Hispánia, beatórum mártyrum Ioánnis de Perúsia, presbyteri, et Petri de Saxoferráto, religiósi, ambórum ex Ordine Minórum, qui, ob fídei prædicatiónem apud Mauros Valentínos, in pública platéa iussu regis cápite detruncáti, martyrii palmam accepérunt.
9 *. Apud Cracóviam in Polónia, beátæ Bronislávæ, vírginis ex Ordine Præmonstraténsium, quæ vitam húmilem et abscónditam dégere vóluit et, monastério suo a Tártaris díruto, in tugúrio mansit cum Deo sola.
10 *. Lancástriæ in Anglia, beáti Richárdi Herst, mártyris, qui, paterfamílias et agrícola, crímine homicídii falso insimulátus, sub lacóbo rege Primo pro Christo láquei supplício damnátus est.
11 *. In æquóribus ponti ante Rupifórtium in Gállia, beáti Ludovíci Vulfilácii Huppy, presbyteri et mártyris, qui témpore gállicæ perturbatiónis propter sacerdótium in fœtida navi inhumáne deténtus ægrótus óbiit.
12 *. Vaterfórdii in Hibérnia, beáti Edmúndi Ignátii Rice, qui omni fervóre ac perseverántia puerórum iuvenúmque institutióni se trádidit in dimíssis condiciónibus, ad quod opus augéndum Congregatiónes Fratrum Christianórum necnon Fratrum a Præsentatióne cóndidit.
13 *. Apud Rhédones in Gállia, beátæ Maríæ a Cruce (loánnæ) Jugan, vírginis, quæ ad stipem pro paupéribus et Deo emendicándam Congregatiónem fundávit Parvulárum Sorórum Páuperum, at ex Institúti moderatióne iníque eiécta, réliquos vitæ annos in oratióne et humilitáte duxit.
14 *. Valéntiæ in Hispánia, beáti Constantíni Fernández Álvarez, presbyteri ex Ordine Prædicatórum et mártyris, qui, témpore persecutiónis, certámen pro fide complévit.
15 *. In vico Hear prope Terúlium item in Hispánia, beáti Francísci Monzón Romeo, presbyteri ex Ordine Prædicatórum et mártyris, qui in eádem persecutióne sánguine suo fidelitátem Dómino confirmávit.
16 *. Intra castra detentiónis Dacháni prope Monáchium Baváriæ in Germánia, beáti Domínici Jędrzejewski, presbyteri et mártyris, qui, bello furénte e Polónia in aliénum cárcerem detráctus, torméntis excruciátus pro Christo occúbuit.
17 *. Posnániæ in Polónia, beátæ Sánciæ (loannínæ) Szymkowiak, vírginis e Congregatióne Filiárum Beátæ Maríæ Vírginis Perdoléntis, quæ, belli tempestátibus sæviéntibus, omni stúdio in cárcere reclúsis consuléndo dedit óperam.
18 *. In pago Sanctæ Iúliæ in Subalpínis Itáliæ, beátæ Terésiæ Bracco, vírginis et mártyris, quæ operária in agris, áltero totíus mundi bello grassánte, strénue castitátem túita, mílitum íctibus percússa occúbuit.
Et álibi aliórum plurimórum sanctórum Mártyrum et Confessórum, atque sanctárum Vírginum.
r. Deo grátias.
v. Pretiósa in conspéctu Dómini, (T.P. Allelúia.)
r. Mors sanctórum eius, (T.P. Allelúia.)
r. Mors sanctórum eius, (T.P. Allelúia.)
Lectio brevis (Eccli 34,14-20)
Spíritus timéntium Dóminum vivet, et in respéctu illíus benedicétur. Spes enim illórum in salvántem illos, et óculi Dei in diligéntes se. Qui timet Dóminum, nihil trepidábit et non pavébit, quóniam ipse est spes eius. Timéntis Dóminum beáta est ánima eius. Ad quem réspicit? Et quis est fortitúdo eius? Oculi Dómini super timéntes eum: protéctor poténtiæ, firmaméntum virtútis, tégimen ardóris et umbráculum meridiáni, custódia offensiónis et adiutórium casus, exáltans ánimam et illúminans óculos, dans sanitátem vitæ et benedictiónem.
Verbum Dómini. r. Deo grátias.
Word of the Lord. r. Let us give thanks to God.
Sancta María et omnes Sancti intercédant pro nobis ad Dóminum, ut nos mereámur ab eo adiuvári et salvári, qui vivit et regnat in sǽcula sæculórum. r. Amen.
May Saint Mary and all the Saints intercede for us with the Lord, that we may deserve to be helped and saved by him who lives and reigns for ever and ever. r. Amen.
Absente sacerdote vel diacono, et in recitatione a solo, sic concluditur:
In the absence of a deacon or a priest, and in the recitation alone, it is concluded thus:
Dóminus nos benedícat, et ab omni malo deféndat, et ad vitam perdúcat ætérnam. r. Amen.
May the Lord bless us, forbid us from all evil, and bring us to eternal life. r. Amen.
Et fidélium ánimæ per misericórdiam Dei requiéscant in pace. r. Amen.
And may their souls rest in peace through the mercy of God. r. Amen.
v. Ite in pace. r. Deo grátias.
v. Go in peace. r. Let us give thanks to God.
The translations proposed here have the sole purpose of a better understanding of the Latin text. They are not to be used in place of the official translations in the liturgy in the vernacular.
