In illo témpore: Véniunt ad Iesum sadducǽi, qui dicunt resurrectiónem non esse, et interrogábant eum dicéntes: “ Magíster, Móyses nobis scripsit, ut si cuius frater mórtuus fúerit et relíquerit uxórem et fílium non relíquerit, accípiat frater eius uxórem et resúscitet semen fratri suo. Septem fratres erant: et primus accépit uxórem et móriens non relíquit semen; et secúndus accépit eam et mórtuus est, non relícto sémine; et tértius simíliter; et septem non reliquérunt semen. Novíssima ómnium defúncta est et múlier. In resurrectióne, cum resurréxerint, cuius de his erit uxor? Septem enim habuérunt eam uxórem ”. Ait illis Iesus: “ Non ídeo errátis, quia non scitis Scriptúras neque virtútem Dei? Cum enim a mórtuis resurréxerint, neque nubent neque nubéntur, sed sunt sicut ángeli in cælis. De mórtuis autem quod resúrgant, non legístis in libro Móysis super rubum, quómodo díxerit illi Deus inquiens: “Ego sum Deus Abraham et Deus Isaac et Deus Iacob”? Non est Deus mortuórum sed vivórum! Multum errátis ”.