Die 24 aprilis
1. Sancti Fidélis de Sigmarínga, presbyteri et mártyris, qui, primum advocátus inter Fratres Minóres Capuccínos adscríptus est, vitam ducens vigíliis et oratiónibus ásperam. In prædicatióne verbi Dei assíduus, cum in Rǽtiam missus esset ut rectam doctrínam firmáret, Sevísii in Helvétia pro fide cathólica ab hæréticis interémptus est.
2. Hierosólymæ, commemorátio sanctárum mulíerum Maríæ Cléophæ et Salóme, quæ cum María Magdaléna bene mane Páschatis ad sepúlcrum Dómini venérunt, ut corpus eius úngerent, et primæ núntium resurrectiónis eius audivérunt.
3. Lugdúni in Gállia, sancti Alexándri, mártyris, qui, tríduo post passiónem sancti Epipódii, e cárcere prodúctus, primum laniátus, deínde cruci affíxus spíritum emísit.
4. Nicomedíæ in Bithynia, sancti Anthimi, epíscopi, et sociórum, mártyrum in persecutióne Diocletiáni imperatóris; illum vero, qui ob Christi confessiónem cápitis obtruncatióne glóriam martyrii suscépit, univérsa gregis multitúdo secúta est, cuius álios gládio detruncári, álios conflagrári ígnibus, álios demum navículis impósitos pélago mérgi iudex iussit.
5. Illíberi in Hispánia Bǽtica, sancti Gregórii, epíscopi, cuius opus “De fide” a sancto Hierónymo laudátur.
6 *. In pago Blesénsi in Gállia Lugdunénsi, sancti Deódati, diáconi et abbátis, qui post vitam anachoréticam ibídem discípulis circa se congregátis præfuit.
7. Cantuáriæ in Anglia, sancti Mellíti, epíscopi, qui, abbas a sancto Gregório papa Magno in Angliam missus, deínde epíscopus Sáxonum orientálium a sancto Augustíno ordinátus, multas post tribulatiónes ad illústrem sedem Cantuariénsem accéssit.
8. Eboráci in Northúmbria, sancti Wilfrídi, epíscopi, qui quadragínta quinque annos magno cum stúdio laborávit et, crébrius sedem áliis cédere coáctus, inter mónachos Riponénses, quibus abbas præfúerat, in pace quiévit.
9. In Hiénsi ínsula Scótiæ, sancti Egbérti, presbyteri et mónachi, qui, omni stúdio plures Európæ regiónes evangelizándas curávit et, iam ætáte provéctus, mónachos ipsos Hiénses cum románo usu in diéi Páschatis computatióne reconciliávit ac festa paschália, missárum sollémniis explétis, statim celebrávit ætérna.
10 *. Moretónii in Normánnia, sancti Guliélmi Firmáti, eremítæ, qui, canónicus et médicus Turónis, post peregrinatiónem Hierosólymam usque in solitúdine vitam egit.
11. Andégavi in Gállia, sanctæ Maríæ a Sancta Euphrásia (Rosæ Virgíniæ) Pelletier, vírginis, quæ Institútum Sorórum a Bono Pastóre fundávit pro muliéribus móribus lapsìs, Magdalénis nuncupátis, misericórditer suscipiéndis.
12. Dinántii in Gállia, sancti Benedícti (Angeli) Menni, presbyteri ex Ordine Sancti Ioánnis a Deo, qui Congregatiónem Sorórum Hospitalariárum a Corde Iesu fundávit.
13 *. Romæ, beátæ Maríæ Elisabeth Hesselblad, vírginis, quæ, e Suécia oriúnda, post longam óperam in valetudinário navátam Ordinem Sanctæ Birgíttæ restítuit, de contemplatióne, de caritáte erga egénos et de unitáte christianórum summópere sollícita.
Et álibi aliórum plurimórum sanctórum Mártyrum et Confessórum, atque sanctárum Vírginum.
r. Deo grátias.
v. Pretiósa in conspéctu Dómini, (T.P. Allelúia.)
r. Mors sanctórum eius, (T.P. Allelúia.)
r. Mors sanctórum eius, (T.P. Allelúia.)
Lectio brevis (1Cor15,13-14.16-17.20)
Si resurréctio mortuórum non est, neque Christus suscitátus est! Si autem Christus non suscitátus est, inánis est ergo prædicátio nostra, inánis est et fides vestra. Nam si mórtui non resúrgunt, neque Christus resurréxit; quod si Christus non resurréxit, stulta est fides vestra; adhuc estis in peccátis vestris. Nunc autem Christus resurréxit a mórtuis, primítiæ dormiéntium.
Verbum Dómini. r. Deo grátias.
Sancta María et omnes Sancti intercédant pro nobis ad Dóminum, ut nos mereámur ab eo adiuvári et salvári, qui vivit et regnat in sǽcula sæculórum. r. Amen.
Absente sacerdote vel diacono, et in recitatione a solo, sic concluditur:
Dóminus nos benedícat, et ab omni malo deféndat, et ad vitam perdúcat ætérnam. r. Amen.
Et fidélium ánimæ per misericórdiam Dei requiéscant in pace. r. Amen.
v. Ite in pace. r. Deo grátias.
