Die 20 aprilis
1. Romæ, sancti Anicéti papæ, cuius fraternitáte hospes insígnis gavísus est sanctus Polycárpus, cum de die Páschatis assignánda simul tractavérunt.
2. Ibídem, commemorátio sanctórum Sulpícii et Servitiáni, mártyrum, via Latína miliário secúndo depositórum.
3. Córdubæ in Hispánia Bætica, sancti Secundíni, mártyris.
4. Ebrodúni in Gállia, sancti Marcellíni, primi eiúsdem urbis epíscopi, qui, ex Africa véniens, máximam partem Alpiurri Maritimárum ad fidem Christi convértit et a sancto Eusébio Vercellénsi ad hanc sedem ordinátus est.
5. Autissiodóri in Gállia Lugdunénsi, sancti Marciáni, mónachi.
6. Apud Constantinópolim, sancti Theodóri, qui, ob ásperam cilícii vestem qua tegebátur Trichínæ cognominátus, integérrimam vitam in solitúdine egit.
7. Antiochíæ in Syria, sancti Anastásii, epíscopi et mártyris, qui, Phoca imperánte, a sicáriis sævíssime necátus est.
8 *. In pago Laurinénsi prope Pæstum in Campánia, sanctæ Heliénæ, vírginis, quæ, in Christi opéribus solidáta, secéssum desérti loci appetívit, ubi sine intermissióne Deo in necessitátibus religiosórum infirmorúmque sérviit.
9 *. Osnabrúgi in Saxónia, sancti Vihónis, epíscopi, qui, in Frísia natus, primum abbas ad evangelizándum a Cárolo Magno imperatóre missus, deínde Ecclésiæ Osnabrugénsi præpósitus, multa pro Christo perpéssus est.
10 *. In monastério Castellariénsi in pago Gálliæ Pictaviénsi, beáti Geráldi de Salis, qui, pauper canónicus ac paupérior dein eremíta et exímiæ pæniténtiæ cultor, multos in amórem Dei inflammávit vel ad erémum convocávit et plúrimas dénique canonicórum regulárium domos fundávit.
11 *. Pisis in Etrúria, beáti Domínici Vernagalli, presbyteri ex Ordine Camaldulénsi, qui órphanis hospítium exstrúxit.
12. Monte Politiáno item in Etrúria, sanctæ Agnétis, vírginis, quæ novénnis vestem sacrárum vírginum índuit et, iam quintum décimum annum tantum agens moniálibus Procéni invíta præpósita, mox sub disciplína sancti Domínici in monastério ab ipsa fundáto veræ humilitátis mirum dedit exémplum.
13 *. Bonóniæ in Æmília, beáti Simónis de Tudérto Rinalducci, presbyteri ex Ordine Eremitárum Sancti Augustíni, qui iúvenes stúdiis déditos populúmque Dei et verbo doctrínæ et exémplo Vitæ dócuit.
14 *. Lancástriæ in Anglia, beatórum lacóbi Bell et Ioánnis Finch, mártyrum, quorum alter, présbyter, post vigínti annos in ália confessióne transáctos, piæ mulíeris cuiúsdam hortátu, cum Ecclésia cathólica tandem reconciliátus est, alter vero, paterfamílias, agrícola et catechísta, ob fidem suam multos annos cárcerem, famem aliósque cruciátus pértulit; qui simul vero sub Elísabeth regína Prima ad gáudia pervenérunt ætérna.
15 *. Londínii item in Anglia, beatórum Richárdi Sargeant et Guliélmi Thomson, presbyterórum et mártyrum, qui, cápite damnáti quod sacerdótes in Angliam ingréssi essent ibíque permansíssent, Tybúrni extrémum supplícium passi sunt.
16 *. Clonæ in Hibérnia, beáti Maurítii MacKenraghty, presbyteri et mártyris, qui, cum duos post annos in cárcere transáctos Elísabeth regínæ Primæ potestátem in spiritálibus agnóscere noluísset, patíbuli supplíciis tráditus est.
17 *. Eboráci in Anglia, beáti Antónii Page, presbyteri et mártyris, qui, vir mansuétus atque honéstus, propter sacerdótium diris cruciátibus damnátus est.
18 *. Londínii item in Anglia, beatórum Francísci Page, e Societáte Iesu, et Robérti Watkinson, presbyterórum et mártyrum, qui simul sub Elisabeth regína Prima propter sacerdótium, cui alter intra solum mensem initiátus erat, Tybúrni patíbulum ascéndere coácti sunt.
19 *. Planélli ad lacum Lárium in Itália, beátæ Claræ (Dinæ) Bosatta, vírginis, quæ, beáto Aloysio Guanella adiuvánte, Párvulam Domum a divína Providéntia fundávit.
20 *. In itínere a campo detentiónis Dacháni ad locum Hartheim prope Línciam in Austria, beáti Anastásii Pankiewicz, presbyteri ex Ordine Fratrum Minórum et mártyris, qui contra régimen christiánam dignitátem ópprimens fidem ad mortem usque testátus est.
Et álibi aliórum plurimórum sanctórum Mártyrum et Confessórum, atque sanctárum Vírginum.
r. Deo grátias.
v. Pretiósa in conspéctu Dómini, (T.P. Allelúia.)
r. Mors sanctórum eius, (T.P. Allelúia.)
r. Mors sanctórum eius, (T.P. Allelúia.)
Lectio brevis (1Cor15,13-14.16-17.20)
Si resurréctio mortuórum non est, neque Christus suscitátus est! Si autem Christus non suscitátus est, inánis est ergo prædicátio nostra, inánis est et fides vestra. Nam si mórtui non resúrgunt, neque Christus resurréxit; quod si Christus non resurréxit, stulta est fides vestra; adhuc estis in peccátis vestris. Nunc autem Christus resurréxit a mórtuis, primítiæ dormiéntium.
Verbum Dómini. r. Deo grátias.
Sancta María et omnes Sancti intercédant pro nobis ad Dóminum, ut nos mereámur ab eo adiuvári et salvári, qui vivit et regnat in sǽcula sæculórum. r. Amen.
Absente sacerdote vel diacono, et in recitatione a solo, sic concluditur:
Dóminus nos benedícat, et ab omni malo deféndat, et ad vitam perdúcat ætérnam. r. Amen.
Et fidélium ánimæ per misericórdiam Dei requiéscant in pace. r. Amen.
v. Ite in pace. r. Deo grátias.
