Die 18 aprilis
1. Meliténe in Arménia, sanctórum Hermógenis et Elpídii, mártyrum.
2. In Pérside, sancti Pusícii, mártyris, qui, præféctus artíficum Sáporis regis Secúndi, cum presbyterum Ananíam titubántem corroborásset, collo perforáto Sábbato Sancto occúbuit, insígnem locum adipíscens in catérva mártyrum post sanctum Symeónem trucidatórum.
3 *. Fani in Picéno Itáliæ, sancti Eusébii, epíscopi, qui sanctum Ioánnem papam Primum a Theodoríco rege Constantinópolim missum comitátus est et post réditum in cárcerem coniéctum secútus.
4 *. Leiglínii in Hibérnia, sancti Lasreáni seu Molássii, abbátis, qui celebratiónis paschális morem románum pacífice in insula exténdit.
5. In cœnóbio Laubiénsi in Hannónia, sancti Ursmári, epíscopi et abbátis, qui Régulam sancti Benedícti propagávit et pópulum ad fidem christiánam addúxit.
6. Constantinópoli, sanctæ Anthúsæ, vírginis, quæ, fília Constantíni Coprónymi imperatóris, in páuperes iuvándos, servos rediméndos, ecclésias reparándas monasteriáque ædificánda omnem impéndit opem et sanctimoniálium vestem a sancto Tarásio epíscopo recépit.
7. In Ægína ínsula, sanctæ Athanásiæ, víduæ, dein solitáriæ et hegúmenæ, monástica observántia et virtútibus illústris.
8. Ibídem, sancti Ioánnis Isáuri, mónachi, qui, discípulus sancti Gregórii Decapolítæ, sub Leóne Arméno irriperatóre pro defensióne sanctórum Imáginum strénue decertávit.
9. Córdubæ in Vandalícia Hispániæ regióne, sancti Perfécti, presbyteri et mártyris, qui a Mauris, quod in Mahométi doctrínam inveherétur firmitérque Christi fidem profiterétur, in cárcererri reclúsus est, dein gládio trucidátus.
10. Brugis in Flándria, beáti Idesbáldi, abbátis, qui, in sæculo mox uxóre orbátus et trigínta adhuc annos in cúria cómitum munéribus functus, ætáte matúrus Dunénse monastérium ingréssus est, cui tértius duódecim annos sancte præfuit.
11. Medioláni in Langobárdia, sancti Galdíni, epíscopi, qui civitáti propter bella impérii evérsæ instaurándæ stúduit et, contióne advérsus hæréticos hábita, spíritum Deo réddidit.
12 *. In Monte Regáli in Aprútio, beáti Andréæ, presbyteri ex Ordine Eremitárum Sancti Augustíni, qui in prædicatiónerri in Itália et Gállia se impéndit.
13 *. In civitáte Gandía in pago Valentíno ad oram Hispániæ, beáti Andréæ Hibernón, religiósi ex Ordine Fratrum Minórum, qui, iúvenis a latrónibus pecúlio expoliátus, dehinc paupertátem mire cóluit.
14 *. Pontísaræ apud Parísios in Gállia, beátæ Maríæ ab Incarnatióne (Bárbaræ) Avrillot, quæ, materfamílias probáta et múlier devotíssima, Carmélum in Gálliam introdúxit et quinque fundávit monastéria, donec, cóniuge defúncto, ipsa vitam religiósam proféssa est.
15 *. Andégavi in Gállia, beáti Ioséphi Moreau, presbyteri et mártyris, qui in gállica perturbatióne in ódium fídei christiánæ féria sexta in Passióne Dómini decollátus est.
16 *. Senis in Etrúria, beátæ Sabínæ Petrilli, vírginis, quæ Congregatiónem Sorórum a Sancta Catharína Senénsi instítuit ad puellárum egenárum et páuperum necessitátibus subveniéndum.
17 *. In óppido Majdanek prope Lublínum in Polónia, beáti Románi Archutowski, presbyteri et mártyris, qui, in cárcerem propter christiánam confessiónem ab aliénis milítibus coniéctus est et fame morbóque afféctus ad glóriam pervénit ætérnam.
Et álibi aliórum plurimórum sanctórum Mártyrum et Confessórum, atque sanctárum Vírginum.
r. Deo grátias.
v. Pretiósa in conspéctu Dómini, (T.P. Allelúia.)
r. Mors sanctórum eius, (T.P. Allelúia.)
r. Mors sanctórum eius, (T.P. Allelúia.)
Lectio brevis (1Cor15,13-14.16-17.20)
Si resurréctio mortuórum non est, neque Christus suscitátus est! Si autem Christus non suscitátus est, inánis est ergo prædicátio nostra, inánis est et fides vestra. Nam si mórtui non resúrgunt, neque Christus resurréxit; quod si Christus non resurréxit, stulta est fides vestra; adhuc estis in peccátis vestris. Nunc autem Christus resurréxit a mórtuis, primítiæ dormiéntium.
Verbum Dómini. r. Deo grátias.
Sancta María et omnes Sancti intercédant pro nobis ad Dóminum, ut nos mereámur ab eo adiuvári et salvári, qui vivit et regnat in sǽcula sæculórum. r. Amen.
Absente sacerdote vel diacono, et in recitatione a solo, sic concluditur:
Dóminus nos benedícat, et ab omni malo deféndat, et ad vitam perdúcat ætérnam. r. Amen.
Et fidélium ánimæ per misericórdiam Dei requiéscant in pace. r. Amen.
v. Ite in pace. r. Deo grátias.
