Die 8 maii
1. Medioláni in Ligúria, commemorátio sancti Victóris, mártyris, qui, génere maurus, cum esset in castris imperiálibus miles, compellénte Maximiáno, ut idólis sacrificáret, arma depósuit atque Laudem Pompéiam dedúctus collum flexit et gládio occúbuit.
2. Byzántii, sancti Acácii mílitis, mártyris.
3. Autissiodóri in Gállia Lugdunénsi, sancti Helládii, epíscopi.
4. Apud Scetim Ægypti montem, sancti Arsénii, qui Románæ Ecclésiæ diáconus fuisse tráditur, Theodósii imperatóris témpore in solitúdinem secéssit ibíque ómnibus virtútibus consummátus Deo spíritum réddidit.
5. In território Catalaunénsi in Gállia, sancti Gibriáni, presbyteri, ex Hibérnia per Gálliam peregríni pro Christo.
6 *. Biturígis in Aquitánia, sancti Desideráti, epíscopi, qui, ántea régii sigílli custos, Ecclésiam hanc mártyrum relíquiis dotávit.
7. Saliónii in pago Santonénsi in Aquitánia, sancti Martíni, presbyteri et abbátis.
8. Romæ apud sanctum Petrum, sancti Bonifátii papæ Quarti, qui templum Pántheon a Phoca imperatóre impetrátum in ecclésiam vertit ac in honórem beátæ Maríæ omniúmque mártyrum Deo dedicávit et valde de monástica disciplína méritus est.
9. I bídem, sancti Benedícti papæ Secúndi, paupertáti amíci, húmilis, mansuéti, patiéntia atque eleemósynis insígnis.
10 *. Verónæ in Venétia, sancti Metrónis, eremítæ, qui ásperam et pæniténtem vitam duxísse fertur.
11. Ruræmúndæ ad Mosam in Brabántia Austrásiæ, sancti Wirónis, qui simul cum sóciis Plechélmo et Otgéro in hac regióne evangelizánda óperam dedísse créditur.
12 *. Saludécii in Picéno Itáliæ, beáti Amáti Ronconi, hospitalitátis stúdio et peregrinórum cura insígnis.
13. In monastério Sanctæ Maríæ della Serra item in Picéno, beáti Angeli de Massátio, presbyteri ex Ordine Camaldulénsium et mártyris, strénui domínicæ diéi observántiæ defensóris.
14 *. Randátii in Sicília, beáti Aloysii Rabata, presbyteri ex Ordine Carmelitárum, in observánda Régula fidelíssimi et erga inimícos caritáte fúlgidi.
15 *. In Quebéco Cánadæ província, beátæ Maríæ Catharínæ a Sancto Augustíno (Catharínæ) Symon de Longprey, vírginis e Soróribus Hospitaláriis a Misericórdia Ordinis Sancti Augustíni, quæ, infirmórum curæ dédita, eos ad spem erigéndo et consolándo excélluit.
16 *. In pago Hegne in Bádena Germániæ província, beátæ Ulrícæ (Francíscæ) Nisch, vírginis, e soróribus Caritátis a Sancta Cruce, quæ in humíllimis opéribus, præcípue in coquæ adiutrícis offício, indeféssam se Dómini præbuit ancíllam.
17 *. In campo exítii Oświęcim seu Auschwitz prope Cracóviam in Polónia, beáti Antónii Bajewski, presbyteri ex Ordine Fratrum Minórum Conventuálium et mártyris, qui, bello sæviénte, in cárcere propter fidem torméntis dire afféctus ad glóriam Dómini pervénit.
Et álibi aliórum plurimórum sanctórum Mártyrum et Confessórum, atque sanctárum Vírginum.
r. Deo grátias.
v. Pretiósa in conspéctu Dómini, (T.P. Allelúia.)
r. Mors sanctórum eius, (T.P. Allelúia.)
r. Mors sanctórum eius, (T.P. Allelúia.)
Lectio brevis (1Cor15,13-14.16-17.20)
Si resurréctio mortuórum non est, neque Christus suscitátus est! Si autem Christus non suscitátus est, inánis est ergo prædicátio nostra, inánis est et fides vestra. Nam si mórtui non resúrgunt, neque Christus resurréxit; quod si Christus non resurréxit, stulta est fides vestra; adhuc estis in peccátis vestris. Nunc autem Christus resurréxit a mórtuis, primítiæ dormiéntium.
Verbum Dómini. r. Deo grátias.
Sancta María et omnes Sancti intercédant pro nobis ad Dóminum, ut nos mereámur ab eo adiuvári et salvári, qui vivit et regnat in sǽcula sæculórum. r. Amen.
Absente sacerdote vel diacono, et in recitatione a solo, sic concluditur:
Dóminus nos benedícat, et ab omni malo deféndat, et ad vitam perdúcat ætérnam. r. Amen.
Et fidélium ánimæ per misericórdiam Dei requiéscant in pace. r. Amen.
v. Ite in pace. r. Deo grátias.
