Die 10 ianuarii
1. Romæ in cœmetério Callísti via Appia, sancti Miltíadis, papæ, qui, ex Africa oriúndus, pacem Ecclésiæ a Constantíno imperatóre rédditam expértus est, sed a sectatóribus Donáti ácriter vexátus ad comparándam concórdiam prudénter incúbuit.
2. In Thebáide, sancti Pauli, eremítæ, monásticæ vitæ inde ab exórdiis cultóris.
3. Nyssæ in Cappadócia, sancti Gregórii, epíscopi, sancti Basilíi Magni fratris, qui, vita et doctrína præclárus, ob rectæ fídei confessiónem sub Valénte imperatóre ariáno e civitáte sua pulsus est.
4. Hierosólymæ, sancti Ioánnis, epíscopi, qui, témpore controvérsiæ de orthodóxa doctrína, magnópere pro cathólica fide et pace Ecclésiæ óperam dedit.
5 *. Deæ Vocontiórum in pago Gálliæ Viennénsi, sancti Petrónii, epíscopi, qui prius monásticam vitam in ínsula Lirinénsi dúxerat.
6. Constantinópoli, sancti Marciáni, presbyteri, in ecclésiis ornándis et indigéntibus sublevándis séduli.
7 *. Lemóvici in Aquitánia, sancti Valérii, qui solitáriam vitarn elégit.
8 *. Meliténe in Arménia, sancti Domitiáni, epíscopi, qui pro conversióne Persárum multum conténdit.
9. Romæ apud sanctum Petrum, deposítio sancti Agathónis, papæ, qui contra monothelitárum erróres íntegram servávit fidem et unitátern Ecclésiæ synodis promóvit.
10 *. In pago Vivariénsi ad Rhódanum in Gállia, sancti Arcóntii, epíscopi.
11. In monastério Cusanénsi ad Pyrenæos saltus, sancti Petri Urséoli, qui, ex Venetiárum duce mónachus efféctus, pietáte et austeritáte cláruit atque in erémo prope monastérium vitam degit.
12 *. In monastério Cavénsi in Campánia, beáti Benincásæ, abbátis, qui centum mónachos in Sicíliam destinávit ad Montis Regális cœnóbium nuper exstrúctum, ut illud replérent.
13. Biturígis in Aquitánia, sancti Guliélmi, epíscopi, qui, desidério solitúdinis meditationísque flagrans, mónachus Cisterciénsis Pontiníaci et demum abbas Cadulíaci factus, tandem Ecclésiæ Bituricénsi præpósitus, monásticæ vitæ austeritátem numquam relaxávit et caritáte erga clerum, captívos miserósque enítuit.
14 *. Amarántii in Lusitánia, beáti Gundisálvi, presbyteri Bracarénsis, qui post longam in Terram Sanctam peregrinatiónem Ordinem Prædicatórum ingréssus est, deínde in erémurri secédens, pontem ædificándum curávit et oratióne prædicationéque áccolis prófuit.
15 *. Arétii in Etrúria, tránsitus beáti Gregórii papæ Décimi, qui, ex archidiácono Leodiénsi ad Petri sedem eléctus, communiónem cum Græcis omnímodo fovit et ad christianórum discídia componénda necnon ad Terram Sanctam recuperándam Concílium Œcuménicum Lugdunénse Secúndum convocávit.
16 *. Laurentiánæ in Lucánia, beáti Ægídii (Bernardíni) Di Bello, religiósi ex Ordine Fratrum Minórum, qui reclúsus in spelúnca vixit.
17 *. Arequípæ in Perúvia, beátæ Annæ ab Angelic Monteagudo, vírginis ex Ordine Prædicatórum, quæ consílii dono et prophetía in bonum totíus civitátis cómiter se cóntulit.
19. Perúsiæ in Itália, sanctæ Francíscæ Salésiæ (Leóniæ) Aviat, vírginis, quæ matérna cum dilectióne industriáque ad óperam iuvénibus præbéndam se devóvit et Oblátas a Sancto Francisco de Sales instítuit.
19 *. Matríti in Hispánia, beátæ Maríæ a Dolóribus Rodríguez Sopeíía, vírginis, quæ, summum christiánæ caritátis præbens testimónium, ad ínfimos societátis témporis suis, præsértirri in subúrbiis maiórum civitátum, própius accéssit et pro evangélio nuntiándo et paupéribus operariísque in re sociáli provehéndis Institútum Dominárum Catechistárum et Opus Doctrinárum excitávit.
Et álibi aliórum plurimórum sanctórum Mártyrum et Confessórum, atque sanctárum Vírginum.
r. Deo grátias.
v. Pretiósa in conspéctu Dómini, (T.P. Allelúia.)
r. Mors sanctórum eius, (T.P. Allelúia.)
r. Mors sanctórum eius, (T.P. Allelúia.)
Lectio brevis (Eccli 34,14-20)
Spíritus timéntium Dóminum vivet, et in respéctu illíus benedicétur. Spes enim illórum in salvántem illos, et óculi Dei in diligéntes se. Qui timet Dóminum, nihil trepidábit et non pavébit, quóniam ipse est spes eius. Timéntis Dóminum beáta est ánima eius. Ad quem réspicit? Et quis est fortitúdo eius? Oculi Dómini super timéntes eum: protéctor poténtiæ, firmaméntum virtútis, tégimen ardóris et umbráculum meridiáni, custódia offensiónis et adiutórium casus, exáltans ánimam et illúminans óculos, dans sanitátem vitæ et benedictiónem.
Verbum Dómini. r. Deo grátias.
Sancta María et omnes Sancti intercédant pro nobis ad Dóminum, ut nos mereámur ab eo adiuvári et salvári, qui vivit et regnat in sǽcula sæculórum. r. Amen.
Absente sacerdote vel diacono, et in recitatione a solo, sic concluditur:
Dóminus nos benedícat, et ab omni malo deféndat, et ad vitam perdúcat ætérnam. r. Amen.
Et fidélium ánimæ per misericórdiam Dei requiéscant in pace. r. Amen.
v. Ite in pace. r. Deo grátias.
