Die 1 maii
1. Sancti loseph opíficis, qui, faber Nazarénus, labóre suo Maríæ et Iesu necessitátibus subvénit et Fílium Dei ad hóminum labóres initiávit. Proptérea, quo die labor multis in oris terrárum commemorátur, christiáni operárii eum exémplar et protectórem venerántur.
2. Comrriemorátio sancti Ieremíæ, prophétæ, qui, témpore Ióachim et Sedecíæ, regum ludæ, Civitátis Sanctæ eversiónem populíque deportatiónem monens, multas persecutiónes passus est, quam ob rem Ecclésia eum hábuit ut Christi patiéntis figúram. Novum æternúmque ínsuper Testaméntum in ipso Christo Iesu consummándum prænuntiávit, quo Pater omnípotens legem suam in imo filiórum Israel corde scríberet, ut esset ipse iis in Deum et essent illi ei in pópulum.
3. In pago Gálliæ Vivariénsi, sancti Andéoli, mártyris.
4. In Hispánia meridionáli, commemorátio sanctórum Torquáti, epíscopi Accitáni, et aliórum sex episcopórum, qui in divérsis civitátibus sedérunt, scílicet Ctésiphon Vérgii, Secúndus Abulæ, Indalétius Urci, Cæcílius Illíberi, Hesychius Cartéiæ et Euphrásius Illitúrgi.
5. Autissiodóri in Gállia, sancti Amatóris, epíscopi, qui in civitáte sua paganórum superstitiónes exstirpáre stúduit et sanctórum mártyrum cultum instítuit.
6. Augústæ Auscórum in Aquitánia, sancti Oriéntii, epíscopi, qui paganórum mores in civitáte sua eradicáre conátus est pacémque inter Romános et Visigothórum Tolosánum regem compónere.
7 *. In Británnia Minóre, sancti Brióci, epíscopi et abbátis, qui e Cámbria ortus in lítore armórico monastérium cóndidit, cui póstea locus sedis episcopális tribútus est.
8. Agáuni in Rætia, deposítio sancti Sigismúndi, qui, rex Burgundiórum, ex ariána hæresi ad cathólicam fidem convérsus, ibídem coram mártyrum sepúlcris assíduum psalléntium chorum instítuit, pæniténtia, lácrimis ac ieiúniis scelus patrátum luit et in Aurelianénsi pago ab adversáriis in púteum demérsus mortem occúbuit.
9 *. In ínsula Británniæ Minóris, sancti Marcúlphi, eremítæ, dein mónachi et abbátis monastérii Nantólii.
10. Elvæ in Cámbria, sancti Asáphi, abbátis et epíscopi sedis póstea ipsíus nómine insignítæ.
11 *. Vapínci in Província Gálliæ, sancti Arígii, epíscopi, patiéntia in advérsis, zelo contra simoníacos et caritáte erga mónachos romános in Anglias missos célebris.
12 *. In pago Montis Albáni in Gállia Narbonénsi, tránsitus sancti Theodárdi, epíscopi Narbonénsis, qui ecclésiam suam cathedrálem restaurávit et disciplínæ zelo flóruit. Morbo afféctus, in monastérium secéssit, ubi ánimam Deo réddidit.
13 *. Fori Semprónii in Picéno Itáliæ, beáti Aldebrándi, epíscopi, vitæ austeritáte et apostólico spíritu præclári.
14 *. Aroúquæ in Lusitánia, beátæ Mapháldæ, vírginis, fíliæ Sáncii regis Primi, quæ, írrito matrimónio reiécto, moniális facta est et reformatiónem Cisterciénsem in monastérium suum introdúxit.
15 *. Apud Montaiónam in Etrúria, beáti Viváldi de Sancto Geminiáno, eremítæ e Tértio Ordine Sancti Francísci, vitæ austeritáte, patiéntia et caritáte in infirmórum cura exímii.
16. Apud Castrum Vallis in Hístria, beáti luliáni Cesarello, presbyteri ex Ordine Minórum, qui per vicos et platéas vagabátur, verbum Dei séminans et factiónes cívium sedáre sátagens.
17. Fori Lívii in Æmília, sancti Peregríni Laziosi, religiósi ex Ordine Servórum Maríæ, qui ex ipsíus Deíparæ famulátu pietáte in Iesum Fílium et sollicitúdine páuperum præstitit.
18 *. Monte Cælo in pago Gálliæ Bellovacénsi, beátæ Petroníllæ, vírginis, primæ abbatíssæ monastérii Clarissárum huius loci.
19. Romæ, natális sancti Pii papæ Quinti, cuius memória prídie huius diéi recólitur.
20. Apud arcem Son-Tây in Tunquíno, sancti Augustíni Schoeffler, presbyteri e Societáte Parisiénsi Missiónum ad éxteras gentes et mártyris, qui, post tres annos in ministérii ópere peráctos in cárcerem coniéctus, in campo Quinque Iúgerum nuncupáto imperatóris Th Dúc iussu cápitis decollatióne martyrii grátiam, quam cotídie a Deo petíerat, accépit.
21. Prope urbem Ham-Dinh item in Tunquíno, sancti Ioánnis Ludovíci Bonnard, presbyteri ex eádem Societáte et mártyris, qui cápitis damnátus, quod vigínti et quinque infántes baptizavísset, abscísso cápite corónam martyrii consecútus est.
22. Medioláni in Itália, sancti Richárdi (Hermínii Philíppi) Pampuri, qui primum medicínam artem in sæculo liberáliter exércuit, deínde Ordinem Sancti Ioánnis a Deo ingréssus, fere biénnio post pie in Dómino quiévit.
23 *. In civitáte Vladimir in Rússia, beáti Cleméntis Šeptyckyj, presbyteri et mártyris, qui, prior monásterii Studitárum óppidi Unix, témpore regíminis in Deum hostílis, in fide persevérans átria cæléstia dignátus est habitáre.
Et álibi aliórum plurimórum sanctórum Mártyrum et Confessórum, atque sanctárum Vírginum.
r. Deo grátias.
v. Pretiósa in conspéctu Dómini, (T.P. Allelúia.)
r. Mors sanctórum eius, (T.P. Allelúia.)
r. Mors sanctórum eius, (T.P. Allelúia.)
Lectio brevis (1Cor15,13-14.16-17.20)
Si resurréctio mortuórum non est, neque Christus suscitátus est! Si autem Christus non suscitátus est, inánis est ergo prædicátio nostra, inánis est et fides vestra. Nam si mórtui non resúrgunt, neque Christus resurréxit; quod si Christus non resurréxit, stulta est fides vestra; adhuc estis in peccátis vestris. Nunc autem Christus resurréxit a mórtuis, primítiæ dormiéntium.
Verbum Dómini. r. Deo grátias.
Sancta María et omnes Sancti intercédant pro nobis ad Dóminum, ut nos mereámur ab eo adiuvári et salvári, qui vivit et regnat in sǽcula sæculórum. r. Amen.
Absente sacerdote vel diacono, et in recitatione a solo, sic concluditur:
Dóminus nos benedícat, et ab omni malo deféndat, et ad vitam perdúcat ætérnam. r. Amen.
Et fidélium ánimæ per misericórdiam Dei requiéscant in pace. r. Amen.
v. Ite in pace. r. Deo grátias.
