v. Deus, ✠ in adiutórium meum inténde.
r. Dómine, ad adiuvándum me festína.
Glória Patri, et Fílio, et Spirítui Sancto. Sicut erat in princípio, et nunc et semper, et in sǽcula sæculórum. Amen.
Allelúia.
Hymnus
Veni, creátor Spíritus, mentes tuórum vísita, imple supérna grátia, quæ tu creásti, péctora.
Qui díceris Paráclitus, donum Dei altíssimi, fons vivus, ignis, cáritas et spiritális únctio.
Tu septifórmis múnere, dextræ Dei tu dígitus, tu rite promíssum Patris sermóne ditans gúttura.
Accénde lumen sénsibus, infúnde amórem córdibus, infírma nostri córporis virtúte firmans pérpeti.
Hostem repéllas lóngius pacémque dones prótinus; ductóre sic te prævio vitémus omne nóxium.
Per te sciámus da Patrem noscámus atque Fílium, te utriúsque Spíritum credámus omni témpore. Amen.
Ant. 1. Erit tibi Dóminus in lucem sempitérnam, et Deus tuus in glóriam tuam, allelúia.
Ant. 1.
Psalmus 122 (123)
Dominus fiducia populi
Duo cæci... clamaverunt: «Domine, miserere nostri, Fili David» (Mt 20, 30).
Ad te levávi óculos meos, * qui hábitas in cælis.
Ecce sicut óculi servórum ad manus dominórum suórum, * sicut óculi ancíllæ ad manus dóminæ suæ,
ita óculi nostri ad Dóminum Deum nostrum, * donec misereátur nostri.
Miserére nostri, Dómine, miserére nostri, * quia multum repléti sumus despectióne;
quia multum repléta est ánima nostra * derisióne abundántium et despectióne superbórum.
Glória Patri, et Fílio, * et Spirítui Sancto.
Sicut erat in princípio, et nunc et semper, * et in sǽcula sæculórum. Amen.
Ant. Erit tibi Dóminus in lucem sempitérnam, et Deus tuus in glóriam tuam, allelúia.
Ant.
Ant. 2. Láqueus contrítus est, et nos liberáti sumus, allelúia.
Ant. 2.
Psalmus 123 (124)
Adiutorium nostrum in nomine Domini
Dixit Dominus Paulo: «Noli timere ... quia ego sum tecum» (Act 18, 9-10).
Nisi quia Dóminus erat in nobis, dicat nunc Israel, † nisi quia Dóminus erat in nobis, * cum exsúrgerent hómines in nos:
forte vivos deglutíssent nos, * cum irascerétur furor eórum in nos.
Fórsitan aqua absorbuísset nos, † torrens pertransísset ánimam nostram * fórsitan pertransíssent ánimam nostram aquæ intumescéntes.
Benedíctus Dóminus; * qui non dedit nos in direptiónem déntibus eórum.
Anima nostra sicut passer erépta est * de láqueo venántium:
láqueus contrítus est, * et nos erépti sumus.
Adiutórium nostrum in nómine Dómini, * qui fecit cælum et terram.
Glória Patri, et Fílio, * et Spirítui Sancto.
Sicut erat in princípio, et nunc et semper, * et in sǽcula sæculórum. Amen.
Ant. Láqueus contrítus est, et nos liberáti sumus, allelúia.
Ant.
Ant. 3. Ego, si exaltátus fúero a terra, ómnia traham ad meípsum, allelúia.
Ant. 3.
Canticum (Eph 1, 3-10)
De Deo salvatore
Benedíctus Deus et Pater Dómini nostri Iesu Christi, * qui benedíxit nos in omni benedictióne spiritáli in cæléstibus in Christo,
sicut elégit nos in ipso ante mundi constitutiónem, † ut essémus sancti et immaculáti * in conspéctu eius in caritáte,
qui prædestinávit nos in adoptiónem filiórum † per Iesum Christum in ipsum, * secúndum beneplácitum voluntátis suæ,
in laudem glóriæ grátiæ suæ, * in qua gratificávit nos in Dilécto,
in quo habémus redemptiónem per sánguinem eius, * remissiónem peccatórum,
secúndum divítias grátiæ eius, † qua superabundávit in nobis * in omni sapiéntia et prudéntia,
notum fáciens nobis mystérium voluntátis suæ, * secúndum beneplácitum eius,
quod propósuit in eo, * in dispensatiónem plenitúdinis témporum:
recapituláre ómnia in Christo, * quæ in cælis et quæ in terra.
Glória Patri, et Fílio, * et Spirítui Sancto.
Sicut erat in princípio, et nunc et semper, * et in sǽcula sæculórum. Amen.
Ant. Ego, si exaltátus fúero a terra, ómnia traham ad meípsum, allelúia.
Ant.
Lectio brevis (Hebr 8, 1b-3a)
Talem habémus pontíficem, qui consédit in déxtera throni Maiestátis in cælis, sanctórum miníster et tabernáculi veri, quod fixit Dóminus, non homo. Omnis enim póntifex ad offerénda múnera et hóstias constitúitur.
Responsorium breve
r. Spíritus Paráclitus, * Allelúia, allelúia. Spíritus. v. Docébit vos ómnia. * Allelúia, allelúia. Glória Patri. Spíritus.
Ant. Spíritus Paráclitus apud vos manébit et in vobis erit, allelúia.
Ant.
Canticum Evangelicum (Lc 1, 46-55)
Exultatio animæ in Domino
Magníficat ✠ * ánima mea Dóminum,
et exsultávit spíritus meus * in Deo salvatóre meo,
quia respéxit humilitátem ancíllæ suæ. * Ecce enim ex hoc beátam me dicent omnes generationes,
quia fecit mihi magna, qui potens est, * et sanctum nomen eius,
et misericórdia eius in progénies et progénies * timéntibus eum.
Fecit poténtiam in bráchio suo, * dispérsit supérbos mente cordis sui;
depósuit poténtes de sede * et exaltávit húmiles;
esuriéntes implévit bonis * et dívites dimísit inánes.
Suscépit Israel púerum suum, * recordátus misericórdiæ,
sicut locútus est ad patres nostros, * Abraham et sémini eius in sǽcula.
Glória Patri, et Fílio, * et Spirítui Sancto.
Sicut erat in princípio, et nunc et semper, * et in sǽcula sæculórum. Amen.
Ant. Spíritus Paráclitus apud vos manébit et in vobis erit, allelúia.
Ant.
Preces
Grátias agéntes Christo, qui consolatióne Spíritus Sancti Apóstolos totámque replévit Ecclésiam, cum ómnibus fidélibus clamémus:
Consoláre Ecclésiam tuam, Dómine.
Mediátor Dei et hóminum, qui sacerdótes cooperatóres tuos elegísti,
— fac, ut omnes ad Patrem per eos ascéndant.
Præsta, ut pauper et dives óbvient sibi, quia utriúsque tu es Deus,
— nec dives gloriétur in ópibus suis.
Evangélium tuum cunctis géntibus manifésta,
— ut omnes pervéniant ad obœditiónem fídei.
Spíritum tuum emítte, consolatórem óptimum,
— ut ómnium mæréntium lácrimas abstérgat.
Animas defunctórum purífica,
— eósque cum sanctis et eléctis tuis in cælum assúme.
Pater noster
Pater noster, qui es in cælis:
sanctificétur nomen tuum;
advéniat regnum tuum;
fiat volúntas tua, sicut in cælo et in terra.
Panem nostrum cotidiánum da nobis hódie;
et dimítte nobis débita nostra,
sicut et nos dimíttimus debitóribus nostris;
et ne nos indúcas in tentatiónem;
sed líbera nos a malo.
Postea dicitur immediate et sine orémus oratio propria, cum conclusione longiore.
Deus, qui lumen indefíciens mérito prædicáris, nobis, ad hanc horam addúctis, et ténebras, quǽsumus, illumináre, et delícta dignáre propitiátus ignóscere. Per Dóminum.
Dóminus vobíscum.
r. Et cum spíritu tuo.
Benedícat vos omnípotens Deus, Pater, ✠ et Fílius, et Spíritus Sanctus.
r. Amen.
Vel alia formula benedictionis, sicut in Missa.
Et si fit dimissio, sequitur invitatio:
v. Ite in pace. r. Deo grátias.
Absente sacerdote vel diacono, et in recitatione a solo, sic concluditur:
Dóminus nos benedícat, et ab omni malo deféndat, et ad vitam perdúcat ætérnam. r. Amen.
