Die 16 septembris
1. Memória sanctórum Cornélii, papæ, et Cypriáni, epíscopi, mártyrum, quorum prióris deposítio alteriúsque pássio quarto décimo septémbris recenséntur; quos vero hac die, ut indefectíbilis veritátis amóris testes témpore perturbatiónis coram Ecclésia Dei et mundo, una voce christiánus orbis laudat.
2. Chalcédone in Bithynia, sanctæ Euphémiæ, vírginis et mártyris, quæ sub Diocletiáno imperatóre et Prisco procónsule, multis pro Christo superátis torméntis, per agónem certáminis ad corónam glóriæ ducta est.
3. In monte Sorácte ad viam Flamíniam in Látio, sanctórum Abúndii et sociórum, mártyrum.
4. Romæ via Nomentána ad Cápream in cœmetério maióre, sanctórum Victóris, Felícis, Alexándri et Pápiæ, mártyrum.
5 . Nucériæ Paganórum in Campánia, sancti Prisci, epíscopi et mártyris, quem sanctus Paulínus Nolánus métricis éxtulit láudibus.
6. Apud Cándidam Casam in Scótia, commemorátio sancti Niniáni, epíscopi, qui, britto natióne, Pictos ad fídei veritátem duxit et sedem episcopálem ibídem státuit.
7. Córdubæ in Vandalícia Hispániæ regióne, sanctórum mártyrum Rogélli, mónachi provéctæ ætátis, et Servidéi (‘Abdallah) iúvenis, qui, ab Oriéntis pártibus oriúndi, audácter coram plebe saracéna Christum prædicavérunt, quaprópter, cum cápite damnáti essent, nulla compúncti tristítia, minibus cruribúsque amputáti collísque demum abscíssi corruérunt.
8 *. Pragæ in Bohémia, sanctæ Ludmíllæ, mártyris, quæ, ducíssa Bohémiæ, institutióni præpósita nepótis sui sancti Venceslái, in cuius ánimo amórem Christi ingígnere conáta est, coniuratióne nurus Drahomíræ et nobílium paganórum stranguláta est.
9. Viltóniæ in Anglia, sanctæ Edíthæ, vírginis, quæ, regis Anglórum fília, in monastério a téneris annis Deo dicáta, sǽculum hoc ignorávit pótius quam relíquit.
10 *. In Monte, Casino, tránsitus beáti Victóris papæ Tértii, qui monastérium célebre trigínta annos sapiénter rexit ac magnífice locupletávit, mox Ecclésiam Románam accépit regéndam.
11 *. Saviníaci in Normánnia Gálliæ, sancti Vitális, abbátis, qui, sæculáribus depósitis munéribus, in desértis locis rigidióris cultum observántiæ dídicit et multos aggregávit in cœnóbium ab ipso cónditum.
12 *. In monastério Horténsi in Castélla Hispániæ, tránsitus sancti Martini, cognoménto Sacerdótis, qui, ex abbáte Cisterciénsi epíscopus Seguntínus ordinátus, omnes curas ad reformándum clerum inténdit, deínde íterum in idem monastérium secéssit.
13 *. Sali in Província Gálliæ, tránsitus beáti Ludovíci Aleman, epíscopi Arelaténsis, qui, in exímia pietáte ac pæniténtia vitam degit.
14 *. Nagasákii in Iapónia, beatórum mártyrum Domínici Shobioye, Michǽlis Timonoya et fílii eius Pauli, qui pro fide decolláti sunt.
15. Limæ in Perúvia, sancti Ioánnis Macías, religiósi ex Ordine Prædicatórum, qui diu humíllimis munéribus functus est, páuperes ægrotósque sédulo curávit et assídue pro defunctórum animábus Rosárii precem orávit.
16. Apud Sai-Ham-Mte in Coréa, pássio sancti Andréæ Kim Taegón, presbyteri et mártyris, qui, duóbus annis summo zelo sacerdotáli múneri déditis, abscísso cápite, gloriósum pértulit martyrium, cuius memória vicésimo septémbris recólitur.
17 *. Apud óppidum Odena in pago Barcinonénsi in Hispánia, beáti Ignátii Casanovas, presbyteri ex Ordine Clericórum Regulárium Scholárum Piárum et mártyris, pro Christo in persecutiónis tempestátibus interfécti.
18 *. In óppido Turís in pago Valentíno item in Hispánia, beatórum mártyrum Laureáni (Salvatóris) Ferrer Cardet, presbyteri, Benedícti (Emmanuélis) Ferrer Jordá et Bernardíni (Pauli) Martinez Robles, religiosórum, e Tértio Ordine Sancti Francísci Capulatórum a beáta Vírgine Perdolénti, quos, in eádem persecutióne, hómines occidérunt, Deus autem ad regnum exaltávit cæléstem.
Et álibi aliórum plurimórum sanctórum Mártyrum et Confessórum, atque sanctárum Vírginum.
r. Deo grátias.
v. Pretiósa in conspéctu Dómini, (T.P. Allelúia.)
r. Mors sanctórum eius, (T.P. Allelúia.)
r. Mors sanctórum eius, (T.P. Allelúia.)
Lectio brevis (Sap 3,7-9)
Fulgébunt iusti et tamquam scintíllæ in arundinéto discúrrent; iudicábunt natiónes et dominabúntur pópulis, et regnábit Dóminus illórum in perpétuum. Qui confídunt in illo, intéllegent veritátem, et fidéles in dilectióne acquiéscent illi, quóniam grátia et misericórdia est sanctis eius, et visitátio eléctis eius.
Verbum Dómini. r. Deo grátias.
Sancta María et omnes Sancti intercédant pro nobis ad Dóminum, ut nos mereámur ab eo adiuvári et salvári, qui vivit et regnat in sǽcula sæculórum. r. Amen.
Absente sacerdote vel diacono, et in recitatione a solo, sic concluditur:
Dóminus nos benedícat, et ab omni malo deféndat, et ad vitam perdúcat ætérnam. r. Amen.
Et fidélium ánimæ per misericórdiam Dei requiéscant in pace. r. Amen.
v. Ite in pace. r. Deo grátias.
