Die 17 iulii
1. Carthágine, natális sanctórum mártyrum Scillitanórum, id est Speráti, Nártzalis, Cittíni, Vetúrii, Felícis, Aquilíni, Lætántii, lanuáriæ, Generósæ, Véstiæ, Donátæ et Secúndæ, qui iussu Saturníni procónsulis, post primam Christi confessiónem in cárcerem trusi et sequénti die in ligno confíxi, cum demum christiános se esse fírmiter conféssi essent et imperatóri honórem divínum recusavíssent, cápite damnáti sunt et in loco occisiónis, flexis génibus unanímiter, grátias Christo agéntes gládio decolláti sunt.
2. Amástride in Paphlagónia, sancti Hyacínthi, mártyris.
3. Híspali in Bætica Hispániæ província, sanctórum lustæ et Rufínæ, vírginum, quæ, a preside Diogeniáno comprehénsæ, diris vexátæ cruciátibus, póstea cárcere, inédia et váriis torsiónibus sunt afflíctæ; tandem lusta in custódia spíritum exhalávit, Rufínæ vero cervix, in confessióne Dómini, confrácta est.
4. Medioláni in Ligúria, sanctæ Marcellínæ, vírginis, soróris sancti Ambrósii epíscopi, quæ Romæ in basílica Sancti Petri in Epiphanía Dómini a Libério papa velum consecratiónis accépit.
5. Romæ in ecclésia in colle Aventíno sita, sub nómine Aléxii celebrátur homo Dei, qui, ut tradítio refert, opuléntam deséruit domur ut inops fíeret et incógnitus eleemósynam mendicáret.
6. Autissiodóri in Gállia Lugdunénsi, sancti Theodósii, epíscopi.
7. Pápiæ in Ligúria, sancti Ennódii, epíscopi, qui hymnis decorávit memórias et templa sanctórum atque divitiárum largus dispensátor fuit.
8 *. Turníni prope Antvérpiam in Brabántia Austrásiæ, sancti Fredegándi, qui mónachus ex Hibérnia venísse dícitur, sancti Foilláni aliorúmque peregrinatiónis et labóris missionárii sócius.
9 *. In monastério Wincelcumbæ in Mércia Angliæ, sancti Kenélmi, qui, Merciórum princeps, martyr reputátus est.
10. Romæ apud sanctum Petrum, sancti Leónis papæ Quarti, Urbis defensóris et primátus Petri cultóris.
11. Apud Stocberau in pago Vindobonénsi Baváriæ, sancti Colmáni, natióne hibérni, qui, pro nómine Dei peregrínus, Terram Sanctam petens, explorátor hostílis hábitus est et, in árbore suspénsus, ad cæléstem Hierosólymam pervénit.
12 *. Nitrávæ ad Vagum flumen apud montes Carpátes, sanctórum Zoerárdi seu Andréæ et Benedícti, eremitárum, qui e Polónia, rogánte sancto Stéphano rege, in Hungáriam venérunt et in erémo montis Zobor vitam egérunt aspérrimam.
13. Cracóviæ in Polónia, sanctæ Hedwígis, quæ, regína in Hungária nata, Polóniæ regnum recépit et laghellióni, magno Lithuániæ duci, nupsit, quocum, in baptísmate Ladisláo vocáto, cathólicam fidem in Lithuánia sevit.
14 *. Parísiis in Gállia, beatárum Terésiæ a Sancto Augustíno (Maríæ Magdalénæ Claudínæ) Lidoine et quíndecim sociárum,9 vírginum e Carmélo Compéndii et mártyrum, quæ, témpore gállicæ perturbatiónis, cum disciplínam monásticam fidéliter servavíssent, cápite damnátæ, ante patíbulum promissiónes fídei baptismális et vota religiósa renovavérunt.
Quarum nomina: beatæ Maria Anna Francisca a Sancto Ludovico Brideau, Maria Anna a Iesu Crucifixo Piedcourt, Carlotta a Resurrectione (Anna Maria Magdalena) Thouret, Euphrasia ab Immaculata Conceptione (Maria Claudia Cypriana) Brard, Henrica a Iesu (Maria Gabriela) de Croissy, Teresia a Corde Mariæ (Maria Anna) Hanisset, Teresia a Sancto Ignatio (Maria Gabriela) Trézelle, lulia Ludovica a Iesu (Rosa) Chrétien de Neufville, Maria Henrica a Providentia (Anna) Pelras, Constantia (Maria Genovefa) Meunier, Maria a Sancto Spiritu (Angelica) Roussel, Maria a Sancta Martha Dufour, Elisabeth lulia a Sancto Francisco Vérolot, Catharina et Teresia Soiron.
15. In pago Zhujiaxiezhuang apud Shenxian in Hebei província Sinárum, sancti Petri Liu Ziyu, mártyris, qui in persecutióne ab ásseclis sectæ « Yihetuan » gesta contra amicórum conátus coram mandaríno in fide christiána fírmiter permánsit, quaprópter gládio perfóssus est.
16 *. Leopoldópoli in Slováchia, beáti Pauli (Petri) Gojdich, epíscopi et mártyris, qui, pastor in território Presoviénsi, témpore regíminis in Deum infénsi in cárcerem coniéctus, tantas passus est ærúmnas, ut, atróciter vexátus, Christi verba fidéliter excípiens per strénuam conféssionem in vitam transíret gloriósam.
Et álibi aliórum plurimórum sanctórum Mártyrum et Confessórum, atque sanctárum Vírginum.
r. Deo grátias.
v. Pretiósa in conspéctu Dómini, (T.P. Allelúia.)
r. Mors sanctórum eius, (T.P. Allelúia.)
r. Mors sanctórum eius, (T.P. Allelúia.)
Lectio brevis (Sap 18,1-3)
Sanctis tuis máxima erat lux; et horum quidem vocem illi audiébant, sed figúram non vidébant et, quia non et ipsi éadem passi erant, magnificábant; quóniam autem, qui ante læsi erant, non lædébant, grátias agébant et, quod eos ante distulíssent, donum petébant. Propter quod ignis ardéntem colúmnam, ducem ignótæ viæ, et solem sine læsúra gloriósæ peregrinatiónis præstitísti.
Verbum Dómini. r. Deo grátias.
Word of the Lord. r. Let us give thanks to God.
Sancta María et omnes Sancti intercédant pro nobis ad Dóminum, ut nos mereámur ab eo adiuvári et salvári, qui vivit et regnat in sǽcula sæculórum. r. Amen.
May Saint Mary and all the Saints intercede for us with the Lord, that we may deserve to be helped and saved by him who lives and reigns for ever and ever. r. Amen.
Absente sacerdote vel diacono, et in recitatione a solo, sic concluditur:
In the absence of a deacon or a priest, and in the recitation alone, it is concluded thus:
Dóminus nos benedícat, et ab omni malo deféndat, et ad vitam perdúcat ætérnam. r. Amen.
May the Lord bless us, forbid us from all evil, and bring us to eternal life. r. Amen.
Et fidélium ánimæ per misericórdiam Dei requiéscant in pace. r. Amen.
And may their souls rest in peace through the mercy of God. r. Amen.
v. Ite in pace. r. Deo grátias.
v. Go in peace. r. Let us give thanks to God.
The translations proposed here have the sole purpose of a better understanding of the Latin text. They are not to be used in place of the official translations in the liturgy in the vernacular.
