In primo nocturno, anno II
Lectio
De Actibus Apostolórum
Illi qui dispérsi fúerant a tribulatióne quæ facta fúerat sub Stéphano, perambulavérunt usque Phœnícen et Cyprum et Antiochíam, némini loquéntes verbum nisi solis Iudæis. Erant autem quidam ex eis viri Cýprii et Cyrenæi qui cum introíssent Antiochíam, loquebántur et ad Græcos evangelizántes Dóminum Iesum. Et erat manus Dómini cum eis; multúsque númerus credéntium convérsus est ad Dóminum. Audítus est autem sermo in áuribus ecclésiæ, quæ erat in Ierúsalem, super istis, et misérunt Bárnabam usque Antiochíam.
Cum Bárnabas pervenísset et vidísset grátiam Dei, gavísus est et hortabátur omnes propósito cordis permanére in Dómino, quia erat vir bonus et plenus Spíritu Sancto et fide. Et appósita est turba multa Dómino. Proféctus est autem Tarsum, ut quæreret Saulum; quem cum invenísset, perdúxit Antiochíam.
Factum est autem eis ut annum totum conversaréntur in ecclésia et docérent turbam multam, et cognominaréntur primum Antiochíæ discípuli Christiáni. In his autem diébus supervenérunt ab Hierosólymis prophétæ Antiochíam; et surgens unus ex eis nómine Agabus, significávit per Spíritum famem magnam futúram in univérso orbe terrárum; quæ facta est sub Cláudio. Discípuli autem, prout quis habébat, proposuérunt sínguli eórum in ministérium míttere habitántibus in Iudæa frátribus; quod et fecérunt, mitténtes ad presbýteros per manum Bárnabæ et Sauli.
r. Expurgáte vetus ferméntum, ut sitis nova conspársio; étenim Pascha nostrum immolátus est Christus: * Itaque epulémur in Dómino, allelúia. v. Non in ferménto malítiæ et nequítiæ, sed in ázymis sinceritátis et veritátis. * Itaque epulémur. v. Glória Patri. * Itaque epulémur.
