Oratio universalis
TEMPORE ADVENTUS (a)
Admonitio sacerdotis
Advéntum Dómini nostri Iesu Christi, fratres caríssimi, votis ómnibus præstolántes, ipsíus misericórdiam impénsius implorémus, ut, sicut ipse ad evangelizándum paupéribus et sanándos contrítos corde venit in mundum, ita, nostris quoque tempóribus, cunctis egéntibus velit præbére salútem.
Ut Ecclésiam suam sanctam vísitet sempérque custódiat, Dóminum deprecémur. r. Kýrie, eléison.
Ut témpora nostra sint, ipsíus protectióne, tranquílla, Dóminum deprecémur. r. Kýrie, eléison.
Ut morbos áuferat, famem depéllat, omnémque tribulatiónem avértat, Dóminum deprecémur. r. Kýrie, eléison.
Ut caritátis suæ testes coram ómnibus homínibus in veritáte maneámus, Dóminum deprecémur. r. Kýrie, eléison.
Oratio sacerdotis
Omnípotens sempitérne Deus, qui salvas omnes et néminem vis períre, exáudi preces pópuli tui et præsta, ut et mundi cursus pacífico nobis tuo órdine dirigátur, et Ecclésia tua tranquílla devotióne lætétur. Per Christum Dóminum nostrum. r. Amen.