Die 4 octobris
1. Memória sancti Francísci, qui post expedítam iuventútem convérsus Asísii in Umbria vitam evangélicam delégit, Iesu Christo in paupéribus máxime derelictísque invénto ipse pauper factus desérviens, et Fratres Minóres sibi in societáte adiúnxit; amórem Dei ómnibus in itínere adúsque Terram Sanctam prædicávit, in verbis et gestis perféctam Christi quærens sequélam, et super nudam terram obíre vóluit.
2. Bonóniæ in Æmília, sancti Petrónii, epíscopi, qui e mundána potestáte in sacerdótii munus ascéndit et de offício episcopáli scriptis et exémplo dócuit.
3*. In pago Gálliæ Turonénsi, sancti Quintíni, mártyris.
4. Parísiis item in Gállia, sanctæ Aureæ, abbatíssæ, quam sanctus Elígius monastério præpósuit intra civitátem ab ipso fundáto sub Régula sancti Columbáni, ubi trecéntas vírgines congregáverat.
5*. Novæ Auréliæ in Ludoviciána e Civitátibus Fœderátis Américæ Septemtrionális, beáti Francísci Xavérii Seelos, presbyteri e Congregatióne Sanctíssimi Redemptóris, e Bavária oriúndus, de puerórum, iúvenum et migrántium necessitátibus assídue sollícitus.
6*. In vico Karaco in pago Valentíno Hispániæ, beáti Henríci Morant Pellicer, presbyteri et mártyris, qui, témpore persecutiónis, certámen pro fide complévit.
7*. Prope civitátem Gandía in eódem pago Hispániæ, beáti Ioséphi Canet Giner, presbyteri et mártyris, qui ob fidelitátem erga Christum sacrifício Salvatóris sociári méruit.
8*. In óppido Bellrreguart item in pago Valentíno, beáti Alaphrídi Pellicer Muñoz, religiósi ex Ordine Fratrum Minórum et mártyris, qui in eádem tempestáte ad palmam usque Christi fidem confirmávit.
