Die 6 aprilis
1. Sírmii in Pannónia, pássio sancti Irenæi, epíscopi et mártyris, qui, témpore Maximiáni imperatóris, sub præside Probo primum torméntis vexátus est, deínde plúrimos dies in cárcere cruciátus ac tandem abscísso cápite consummátus est.
2. Constantinópoli, sancti Eutychii, epíscopi, qui Concílio Œcuménico Constantinopolitáno Secúndo præfuit, ubi pro fide orthodóxa fórtiter pugnávit, et, cum longum passus esset exsílium, móriens resurrectiónem carnis proféssus est.
3. Romæ, sanctæ Gallæ, quæ, fília Symmachi cónsulis, cóniuge defúncto, apud ecclésiam Sancti Petri multos annos oratióni, eleemósynis, ieiúniis aliísque sanctis opéribus inténta permánsit; cuius felicíssirrium tránsitum sanctus Gregórius papa Magnus descrípsit.
4 *. Trecis in Néustria, sancti Winebáldi, abbátis monastérii Sancti Lupi, austeritáte præclári.
5 *. Ibídem, sancti Prudéntii, epíscopi, qui breviárium Psaltérii pro itinerántibus compósuit, præcépta ex Scriptúris deprómpta pro candidátis ad sacerdótium collégit et monasteriórum disciplínam instaurávit.
6. Velerádii in Morávia, natális sancti Methódii, epíscopi, qui una cum fratre sancto Cyríllo die décima quarta februárii cólitur.
7 *. In monastério Sangallénsi in Suévia Germániæ, beáti Notkéri Bálbuli, mónachi, qui pæne totam vitam in hoc cœnóbio duxit, plures compónens sequéntias, córpore non ánimo grácilis ac voce non spíritu bálbulus, in divínis eréctus, in advérsis pátiens, in omnes mitis, in orándo, legéndo, meditándo, dictándo navus.
8 *. In monastério Sancti Elíæ de Aulínis apud Palmam in Calábria, sancti Philaréti, mónachi, oratióni valde inténti.
9. In ínsula Eschíloe prope Roschíldiam in Dánia, sancti Guliélmi, abbátis, qui, ex cœnóbio canonicórum regulárium Parisiénsi in Dániam vocátus, disciplínam regulárem non sine labóribus et impediméntis instaurávit et illucescénte die domínica Páschatis e vita discéssit.
10. Apud Mediolánum in Langobárdia, pássio sancti Petri Veronénsis, presbyteri ex Ordine Prædicatórum et mártyris, qui, paréntibus manichæórum ásseclis natus, adhuc puérulus fidem cathólicam ampléxus est et aduléscens ab ipso sancto Domínico hábitum accépit omnem labórem impértiens hærésibus debellándis, donec in itínere ad Comum ab hóstibus interféctus est suprémo témpore symbolum fídei cónfitens.
11 *. In monastério Sanctæ Maríæ ad Sacrum Montem supra Varésium in Langobárdia, beátæ Catharínæ de Pallántia, vírginis, quæ cum sóciis eremíticam egit vitam sub Régula sancti Augustíni.
12. In urbe Uinń Art in Tunquíno, sancti Pauli Le Båo Tinh, presbyteri et mártyris, qui, adhuc cléricus, diu in cárcere pro fide tentus est et, sacerdótio auctus, seminárium rexit atque homiliárum librum doctrinæque christiánæ compéndium confécit, demum íterum in iudícium dedúctus, sub imperatóre TQ Dúc, cápite damnátus est.
13 *. Verónæ in Itália, beáti Zephyríni Agostini, presbyteri, qui ad ministérium prædicatiónis, catechésim et christiánam institutiónem se impéndit atque omnímodo ópera pro iuventúte, paupéribus ægrotísque provídit, pro quibus étiam Congregatiónes Ursulinárum Filiárum Maríæ Immaculátæ instítuit.
14 *. Augústæ Taurinórum in Itália, beáti Michǽlis Rua, presbyteri, exímii Societátis Salesiánæ propagatóris.
15 *. In óppido Fiobbio di Dlbino prope Bérgomum in Itália, beátæ Petrínæ Morosini, vírginis et mártyris, quæ, vigínti sex annos nata, ex officína ubi laborábat domum rédiens in defendénda advérsus iúvenem virginitáte, quam Deo vóverat, ad necem caput cæsa occúbuit.
Et álibi aliórum plurimórum sanctórum Mártyrum et Confessórum, atque sanctárum Vírginum.
r. Deo grátias.
v. Pretiósa in conspéctu Dómini, (T.P. Allelúia.)
r. Mors sanctórum eius, (T.P. Allelúia.)
r. Mors sanctórum eius, (T.P. Allelúia.)
Lectio brevis (Col 3,1-4)
Si conresurrexístis Christo, quæ sursum sunt quǽrite, ubi Christus est in déxtera Dei sedens; quæ sursum sunt sápite, non quæ supra terram. Mórtui enim estis, et vita vestra abscóndita est cum Christo in Deo! Cum Christus apparúerit, vita vestra, tunc et vos apparébitis cum ipso in glória.
Verbum Dómini. r. Deo grátias.
Sancta María et omnes Sancti intercédant pro nobis ad Dóminum, ut nos mereámur ab eo adiuvári et salvári, qui vivit et regnat in sǽcula sæculórum. r. Amen.
Absente sacerdote vel diacono, et in recitatione a solo, sic concluditur:
Dóminus nos benedícat, et ab omni malo deféndat, et ad vitam perdúcat ætérnam. r. Amen.
Et fidélium ánimæ per misericórdiam Dei requiéscant in pace. r. Amen.
v. Ite in pace. r. Deo grátias.
