Die 29 aprilis
1. Memória sanctæ Catharínæ Senénsis, vírginis et Ecclésiæ doctóris, quæ, inter Soróres de Pæniténtia Sancti Domínici, Deum in se et se in Deo cognóscere et Christo crucifíxo confórmis fíeri stúduit; ad pacem sectándam, ad Románum Pontíficem ad Urbem reducéndum et ad Ecclésiæ unitátem redintegrándam fórtiter ac indesinénter certávit et summæ doctrínæ spiritális præclára relíquit documénta.
2 . Commemorátio sancti Tychici, discípuli beáti Pauli Apóstoli, quem Apóstolus in epístulis fratrem caríssimum, minístrum fidélem et consérvum suum in Dómino appéllat.
3. Pisis in Etrúria, sancti Torpétis, mártyris.
4. Neápoli in Campánia, sancti Sevéri, epíscopi, quem sanctus Ambrósius ut fratres et Ecclésia ipsíus ut patrem diléxit.
5. Cluníaci in Burgúndia, sancti Hugónis, abbátis, qui sexagínta et unum annos sancte monastérium loci rexit, eleemósynis orationíque iúgiter inténtus, monásticæ disciplínæ custos et promótor instantíssimus, sanctæ Ecclésiæ procurátor et propagátor fervens.
6 . Lucérnæ in Normánnia, sancti Achárdi, epíscopi Abrincénsis, qui, quondam abbas Sancti Victóris Parisiénsis, plures scripsit tractátus de vita spiritáli, quibus ánima christiána ad perfectiónis fastígium perducerétur, et in abbátia Ordinis Præmonstraténsis, quam frequénter adíbat, óbiit et sepúltus est.
7. Seuli in Coréa, sancti Antónii Kim Sóng-u, mártyris, qui domi suæ complúres congregáre consuéverat fiddles et demum in cárcere pro Christo strangulátus est.
Et álibi aliórum plurimórum sanctórum Mártyrum et Confessórum, atque sanctárum Vírginum.
r. Deo grátias.
v. Pretiósa in conspéctu Dómini, (T.P. Allelúia.)
r. Mors sanctórum eius, (T.P. Allelúia.)
r. Mors sanctórum eius, (T.P. Allelúia.)
Lectio brevis (Sap 4,1-2)
Mélius est absque líberis esse cum virtúte; immortálitas est enim in memória illíus, quóniam et apud Deum nota est et apud hómines. Cum præsens est, imitántur illam; et desíderant eam, cum se edúxerit; et in perpétuum coronáta triúmphat, incoinquinatórum certáminum prǽmium vincens.
Verbum Dómini. r. Deo grátias.
Sancta María et omnes Sancti intercédant pro nobis ad Dóminum, ut nos mereámur ab eo adiuvári et salvári, qui vivit et regnat in sǽcula sæculórum. r. Amen.
Absente sacerdote vel diacono, et in recitatione a solo, sic concluditur:
Dóminus nos benedícat, et ab omni malo deféndat, et ad vitam perdúcat ætérnam. r. Amen.
Et fidélium ánimæ per misericórdiam Dei requiéscant in pace. r. Amen.
v. Ite in pace. r. Deo grátias.
