Die 5 februarii
1. Memória sanctæ Agathæ, vírginis et mártyris, quæ Cátanæ in Sicília, adhuc puélla, sæviénte persecutióne, corpus incontaminátum et fidem íntegram in martyrio servávit, testimónium præbens pro Christo Dómino.
2. In Ponto, commemorátio plurimórum sanctórum mártyrum in persecutióne Maximiáni imperatóris, qui, álii plumbo liquénti perfúsi, álii acútis arundínibus in únguibus cruciáti ac multis vexáti iterátis torméntis, palmas a Dómino et corónas illústri passióne meruérunt.
3. Viénnæ in Gállia Lugdunénsi, sancti Avíti, epíscopi, cuius fide et indústria, témpore Gundobáldi regis, ab infestatióne ariánæ hæresis Gálliæ defénsæ sunt.
4. Sebánæ in Rætia, sancti Ingenuíni, qui primus huius sedis fuit epíscopus.
5 *. In Lucánia, sancti Lucæ, abbátis sub institútis sanctórum orientálium, qui actuósam vitam monásticam primum in Sicília, pátria sua, dein Saracenórum irruptiónum causa váriis in locis duxit, demum in monastério Carbonénsi Sanctórum Elíæ et Anastásii prope Arméntum ab ipso cóndito óbiit.
6 *. Romæ in monastério Sancti Cæsárii, sancti Sabæ, lunióris nuncupáti, mónachi, qui cum fratre sancto Macário per Calábriam et Lucániam témpore vastatiónum Saracenórum vitam cœnobíticam indefésse diffúdit.
7. Brixínæ in pago Tridentíno, commemorátio sancti Albuíni, epíscopi, qui e Sebána hanc in civitátem episcopálem cáthedram tránstulit.
8 *. Colóniæ Agrippínæ in Lotharíngia, sanctæ Adalhéidis, primæ monastérii Vilicénsis abbatíssæ, in quod Régulam sancti Benedícti introdúxit, dein étiam monastérii Sanctæ Maríæ Coloniénsis, ubi decéssit.
9. Nagasákii in Iapónia, pássio sanctórum Pauli Miki et vigínti quinque sociórum, mártyrurri, quorum memória cras ágitur.
10 *. Valle Guidónis in Gállia, beátæ Francíscæ Mézière, vírginis et mártyris, quæ púeris instituéndis et ægrótis curándis se trádidit et térnpore gállicæ perturbatiónis in ódium fídei interémpta est.
11. Romæ, beátæ Elísabeth Canori Mora, matrisfamílias, quæ diu infidelitáte cóniugis, angústias œconómicas et crudéles propinquórum moléstias perpéssa, ómnia invícta cum caritáte ac patiéntia sústulit, pro peccatórum conversióne, salúte, pace ac sanctitáte Dómino vitam ófferens et in Tértium Ordines Sanctíssimæ Trinitátis se ággregans.
12. In loco Ualtiervílla in México, sancti Iesu Méndez, presbyteri et mártyris, qui pro Christi regno occúbuit in persecutióne mexicána.
Et álibi aliórum plurimórum sanctórum Mártyrum et Confessórum, atque sanctárum Vírginum.
r. Deo grátias.
v. Pretiósa in conspéctu Dómini, (T.P. Allelúia.)
r. Mors sanctórum eius, (T.P. Allelúia.)
r. Mors sanctórum eius, (T.P. Allelúia.)
Lectio brevis (Eccli 51,13-14)
Exaltávi de terra supplicatiónem meam et pro morte defluénte deprecátus sum. Invocávi Dóminum: “Pater meus es tu, ne derelínquas me in die tribulatiónis meæ et in témpore superbórum sine adiutório.
Verbum Dómini. r. Deo grátias.
Sancta María et omnes Sancti intercédant pro nobis ad Dóminum, ut nos mereámur ab eo adiuvári et salvári, qui vivit et regnat in sǽcula sæculórum. r. Amen.
Absente sacerdote vel diacono, et in recitatione a solo, sic concluditur:
Dóminus nos benedícat, et ab omni malo deféndat, et ad vitam perdúcat ætérnam. r. Amen.
Et fidélium ánimæ per misericórdiam Dei requiéscant in pace. r. Amen.
v. Ite in pace. r. Deo grátias.
