Die 10 septembris
1. Alexandríæ in Ægýpto, sancti Nemésii, mártyris, qui, primum per calúmniam quasi latro iúdici delátus eóque crímine absolútus, mox, in persecutióne Décii imperatóris, christiánæ religiónis nómine coram Æmiliáno iúdice accusátus, a quo, geminátis supplíciis excruciátus, cum latrónibus iussus est incéndi, Salvatóris déferens similitúdinem, qui una cum latrónibus pértulit crucem.
2. Commemorátio sanctórum Nemesiáni et sociórum Felícis, Lúcii, alteríus Felícis, Littéi, Poliáni, Victóris, ladéris et Datívi, qui, epíscopi, presbyteri et diáconi, in Africa sub Valeriáno et Galliéno imperatóribus, exsurgénte persecutiónis rábie, primum pro Christo gráviter fústibus cæsi, deínde compédibus vincti et ad fodiénda metálla deputáti sunt, sancto Cypriáno epístulis adhortánte, ut fírmiter sustinérent caténas et domínica conservárent mandáta.
3. Constantinópoli, sanctæ Pulchériæ, quæ rectam fidem deféndit et promóvit.
4. Nováriæ in Ligúria, sancti Agábii, epíscopi.
5. Albiæ in Aquitánia, sancti Sálvii, epíscopi, qui, e claustro edúctus, ad hanc sedem invítus ordinátus est; peste invalescénte, bonus pastor numquam ab urbe recédere vóluit.
6. Prope Spiram in Rhenánia Austrásiæ, pássio sancti Theodárdi, epíscopi Tungrénsis et mártyris, qui in itínere ad regem Childerícum occísus est.
7 *. Abríncis in Néustria, sancti Autbérti, epíscopi, cuius stúdio sancti Michǽlis Archángeli cultus in monte Tumba flóruit.
8 *. In monastério Locediénsi apud Vercéllas in Subalpínis, beáti Oglérii, abbátis ex Ordine Cisterciénsi.
9. Tolentíni in Picéno Itáliæ, sancti Nicolái, presbyteri ex Ordine Eremitárum Sancti Augustíni, qui arctíssimæ abstinéntiæ déditus et oratióne assíduus, sevérus in se, clemens vero in céteros, pæniténtiam aliórum sæpe sibi imponébat.
10 *. Nagasákii in Iapónia, beatórum Sebastiáni Kimura, e Societáte Iesu, Francísci Morales, ex Ordine Prædicatórum, presbyterórum, et quinquagínta sociórum, mártyrum, qui, presbyteri, religiósi, cóniuges, iúvenes, catechístæ, víduæ et infántes, in colle coram ingénti turba sævíssimis cruciátibus pro Christo occubuérunt.
Quorum nomina: beati Angelus Orsucci, Alphonsus de Mena, losephus a Sancto Hyacintho de Salvanés, Hyacinthus Orfanel, presbyteri ex Ordine Prædicatorum, atque Dominicus a Rosario et Alexius, religiosi ex eodem Ordine; Richardus a Sancta Anna et Petrus de Abula, presbyteri ex Ordine Fratrum Minorum, atque Vincentius a Sancto losepho, religiosus ex eodem Ordine; Carolus Spínola, presbyter e Societate Iesu, atque Gundisalvus Fusai, Antonius Kiuni, Thomas a Rosario, Thomas Akahoshi, Petrus Sampo, Michael Shumpo, Ludovicus Kawara, Ioannes Chugoku, religiosi ex eadem Societate; Leo de Satsuma, Lucia de Freitas; Antonius Sanga, catechista, et Magdalena, coniuges; Antonius Coreanus, catechista, et Maria, coniuges, cum filiis e'orum loanne et Petro; Paulus Nagaishi et Thecla, coniuges, cum filio eorum Petro; Paulus Tanaka et Maria, coniuges; Dominicus Yamada et Clara, coniuges; Isabella Fernández, vidua beati Dominici Jorge, cum filio eius Ignatio; Maria, vidua beati Andreæ Tokuan; Agnes, vidua beati Cosmæ Takeya; Maria, vidua beati loannis Shoun; Dominica Ogata, Maria Tanaura, Apollonia et Catharina, viduæ; Dominicus Nakano, filius beati Matthiæ Nakano; Bartholomæus Kawano Shichiemon; Damianus Yamichi Tanda et filius eius Michael; Thomas Shichiro, Rufus Ishimoto; Clemens (Bosio) Vom et filius eius Antonius.
11. Londínii in Anglia, sancti Ambrósii Eduárdi Barlow, presbyteri ex Ordine Sancti Benedícti et mártyris, qui vigínti quáttuor annos in Lancástriæ regióne cathólicos in fide ac pietáte firmávit et, comprehénsus dum die Páschatis Dómini prædicábat, sub Cárolo rege Primo post cárcerem propter sacerdótium cápite damnátus, Tybúrni patíbulo suspénsus est.
12 *. In æquóribus ponti ante Rupifórtium ad litus Gálliæ, beáti Iacóbi Gagnot, presbyteri ex Ordine Carmelitáno et mártyris, qui, témpore gállicæ perturbatiónis propter sacerdótium in squálidam navem inhumáne coniéctus, concaptívos ægrótos susténtans carnis tabe consúmptus est.
Et álibi aliórum plurimórum sanctórum Mártyrum et Confessórum, atque sanctárum Vírginum.
r. Deo grátias.
v. Pretiósa in conspéctu Dómini, (T.P. Allelúia.)
r. Mors sanctórum eius, (T.P. Allelúia.)
r. Mors sanctórum eius, (T.P. Allelúia.)
Lectio brevis (Iac 5, 8-11)
Patiéntes estóte, et vos, confirmáte corda vestra, quóniam advéntus Dómini appropinquávit. Nólite ingemíscere fratres, in altérutrum, ut non iudicémini; ecce iudex ante iánuam assístit. Exémplum accípite, fratres, labóris et patiéntiæ prophétas, qui locúti sunt in nómine Dómini. Ecce beatificámus eos, qui sustinuérunt; sufferéntiam Iob audístis et finem Dómini vidístis, quóniam miséricors est Dóminus et miserátor.
Be you therefore also patient, and strengthen your hearts: for the coming of the Lord is at hand. Grudge not, brethren, one against another, that you may not be judged. Behold the judge standeth before the door. Take, my brethren, for an example of suffering evil, of labour and patience, the prophets, who spoke in the name of the Lord. Behold, we account them blessed who have endured. You have heard of the patience of Job, and you have seen the end of the Lord, that the Lord is merciful and compassionate.
Verbum Dómini. r. Deo grátias.
Sancta María et omnes Sancti intercédant pro nobis ad Dóminum, ut nos mereámur ab eo adiuvári et salvári, qui vivit et regnat in sǽcula sæculórum. r. Amen.
Absente sacerdote vel diacono, et in recitatione a solo, sic concluditur:
Dóminus nos benedícat, et ab omni malo deféndat, et ad vitam perdúcat ætérnam. r. Amen.
Et fidélium ánimæ per misericórdiam Dei requiéscant in pace. r. Amen.
v. Ite in pace. r. Deo grátias.
