Die 11 septembris
1. Romæ in cœmetério Basíllæ via Salária Vétere, deposítio sanctórum mártyrum Proti et Hyacínthi, quos sanctus Dámasus papa, eórum túmulos terra recónditos restítuens, vérsibus exornávit. Ibídem, fere quíndecim post sæculis, dénuo sancti Hyacínthi intáctum sepúlcrum corpúsque cremátum invéntum est.
2 *. Túrici apud Helvétios, sanctórum mártyrum Felícis et Régulæ.
3. Commemorátio sancti Paphnútii, epíscopi in Ægýpto, qui unus fuit ex iis fídei confessóribus, qui sub Galério Maximíno imperatóre, dextro óculo effósso et sinístro póplite succíso, ad metálla damnáti fuérunt; deínde Concílii Nicæni párticeps, advérsus ariános pro fide cathólica strénue decertávit.
4. Lugdúni in Gállia, sancti Patiéntis, epíscopi, qui caritáte motus, iuxta Rhódanum et Ararem flúmina civitátibus plúrimum fruménti gratis dispértiit, ut pópulis fame oppréssis subveníret, et apostolátum fuse impéndit in hæreticórum conversiónem egenorúmque curam.
5. Parísiis in Gállia, tránsitus sancti Sacerdótis, epíscopi Lugdunénsis, qui in amóre timoréque Dei vixit et, cum in hanc civitátem ad concílium advenísset, ibídem óbiit.
6 *. In ínsula Bardsey ad oram Cámbriæ septemtrionális, sancti Daniélis (Deiniol Wyn), epíscopi et abbátis Bancorénsis.
7 *. In monastério Luxoviénsi in Burgúndia, tránsitus sancti Adélphii, abbátis monastérii Romaricénsis, qui dissentiónem brevis moménti lácrimis diu profúsis luit.
8 *. Tulli in Austrásia, sancti Leudíni seu Bodónis, epíscopi, qui primum uxorátus, dein ad vitam monásticam se cóntulit, Odíla cóniuge simul idem capiénte consílium.
9 *. In monastério Aulinénsi in Calábria, sancti Elíæ, cognoménto Speleótæ, vitæ eremíticæ et cœnobíticæ insígnis cultóris.
10 *. Nagasákii in Iapónia, beatórum Gásparis Koteda, catechístæ, Francísci Takeya et Petri Shichiemon puerórum, mártyrum qui, cum patres eórum prídie huius diéi passi essent, ibídem eádem firmitáte idem supplícium decollatiónis ipsi pro Christo subiérunt.
11 *. Romæ, beáti Bonaventúræ de Barcinóne (Michǽlis) Gran, fratris ex Ordine Fratrum Minórum, qui, reguláris observántiæ stúdio, plúribus in locis territórii románi convéntus instítuit ad sacros recéssus, semper máximam éxhibens austeritátem vitæ et caritátem erga páuperes.
12 *. Ad litus Gálliæ apud Rupifórtium in navi ad áncoras constitúta, beáti Francísci Mayaudon, presbyteri et mártyris, qui, témpore gállicæ perturbatiónis propter sacerdótium in navi servitútis comprehénsus, novíssime carnis tabe consúmptus est.
13. In urbe Uciaménsi provínciæ Hubei Sinárum, sancti Ioánnis Gabriélis Perboyre, presbyteri e Congregatióne Missiónis et mártyris, qui ad prædicándum Evangélium spéciem sumpsit iuxta consuetúdines loci, sed persecutióne adveniénte, in diútino cárcere váriis cruciátibus afféctus, demum in cruce appénsus est et láqueo strangulátus.
14 *. Barcinóne in Hispánia, beáti Petri de Alcántara (Lauréntii) Villanueva Larráyoz, religiósi ex Ordine Sancti Ioánnis a Deo et mártyris, qui, persecutióne erga fidem sæviénte, quod religiósus esset, martyrium assecútus est.
15 *. In vico Genovès in pago Valentíno item in Hispánia, beáti Ioséphi Maríæ Segura Penadés, presbyteri et mártyris, qui in eádem persecutióne sánguinem pro Christo effúdit.
Et álibi aliórum plurimórum sanctórum Mártyrum et Confessórum, atque sanctárum Vírginum.
r. Deo grátias.
v. Pretiósa in conspéctu Dómini, (T.P. Allelúia.)
r. Mors sanctórum eius, (T.P. Allelúia.)
r. Mors sanctórum eius, (T.P. Allelúia.)
Lectio brevis (Sap 18,1-3)
Sanctis tuis máxima erat lux; et horum quidem vocem illi audiébant, sed figúram non vidébant et, quia non et ipsi éadem passi erant, magnificábant; quóniam autem, qui ante læsi erant, non lædébant, grátias agébant et, quod eos ante distulíssent, donum petébant. Propter quod ignis ardéntem colúmnam, ducem ignótæ viæ, et solem sine læsúra gloriósæ peregrinatiónis præstitísti.
Verbum Dómini. r. Deo grátias.
Word of the Lord. r. Let us give thanks to God.
Sancta María et omnes Sancti intercédant pro nobis ad Dóminum, ut nos mereámur ab eo adiuvári et salvári, qui vivit et regnat in sǽcula sæculórum. r. Amen.
May Saint Mary and all the Saints intercede for us with the Lord, that we may deserve to be helped and saved by him who lives and reigns for ever and ever. r. Amen.
Absente sacerdote vel diacono, et in recitatione a solo, sic concluditur:
In the absence of a deacon or a priest, and in the recitation alone, it is concluded thus:
Dóminus nos benedícat, et ab omni malo deféndat, et ad vitam perdúcat ætérnam. r. Amen.
May the Lord bless us, forbid us from all evil, and bring us to eternal life. r. Amen.
Et fidélium ánimæ per misericórdiam Dei requiéscant in pace. r. Amen.
And may their souls rest in peace through the mercy of God. r. Amen.
v. Ite in pace. r. Deo grátias.
v. Go in peace. r. Let us give thanks to God.
The translations proposed here have the sole purpose of a better understanding of the Latin text. They are not to be used in place of the official translations in the liturgy in the vernacular.
