In secundo nocturno, anno I
Ex Tractátu Balduíni Cantuariénsis epíscopi De sacraménto Eucharístiæ (Tract. diversi 1: PL 204, 414)
Lectio I
Fratres dilectíssimi, firmíssime teneámus et indubitánter credámus quod de sacra communióne, ipsíus Dei et sanctórum patrum auctóritas nobis credéndum præscríbit. In hoc sacraménto continétur virtus reparatiónis nostræ, prétium redemptiónis nostræ; véritas occúlta ad exercítium fídei nostræ, disciplína Christi repræsentátur ad exémplum vitæ nostræ. Unde cum hoc sacrifícium Dóminus institúeret, et discípulis tráderet, dixit: " Hoc fácite in meam commemoratiónem. Fácite quod fácio, offérte quod óffero; sic vívite , ut ego dóceo. Vivéndi et moriéndi formam hinc accípite, quam meo exémplo vobis trado. "
r. Quis est homo qui vivit et non vidébit mortem? * Aut quis éruet ánimam suam de manu ínferi? v. Quis novit potestátem iræ tuæ aut præ timóre tuo iram tuam dinumeráre? * Aut.
Lectio II
Efficit hoc sacraméntum nobis ut vivat Christus in nobis, et nos in ipso. Efficit in nobis ut, sicut mórtuus est Christus pro nobis, ita et nos moriámur pro Christo. Quicúmque autem moriúntur in Christo, aut pro Christo, cum pietáte dormitiónem, et óptimam habent repósitam grátiam. Glória resurrectiónis illíus repromíttitur et reservátur, cuius reparátio salutáris est huius sacraménti digna percéptio, cuius virtúte reformábit Deus corpus humilitátis nostræ configurátum córpori claritátis suæ. Quid dignum retribuémus Dómino pro tanta grátia nobis colláta? Pro tanto honóre quid recompensábimus ei? An ipse nos díligat, frustra quritur, qui in signum inæstimábilis dilectiónis, in se nobis præbet panem vitæ ætérnæ et cálicem salútis perpétuæ.
r. Factus est mihi Dóminus in refúgium, * Et Deus meus in auxílium spei meæ. v. Deus ultiónum Dóminus, Deus ultiónum líbere egit. * Et.
Lectio III
Iustum est ítaque ut, in quantum permíttit humána infírmitas, digne et reverénter accipiámus tam præclárum donum Dei, tam exímium benefícium, ut custodiámus illud, sicut pupíllam óculi; immo plus quam pupíllam óculi, sicut vitam nostram, sicut salútem nostram, sicut spem et rem resurrectiónis et glóriæ nostræ. Quidquid per neglegéntiam, contra reveréntiam tanti sacraménti háctenus peccávimus, exactióre et propensióre diligéntia in pósterum emendémus; et damna prióris témporis, et anteáctæ vitæ, honestióre propósito et maturióre consílio compensémus, rediméntes tempus, quóniam dies mali sunt.
r. Misericórdiam et iudícium cantábo tibi, Dómine; psallam et intélligam * In via immaculáta, quando vénies ad me. v. Perambulábam in innocéntia cordis mei, in médio domus meæ, * In via. v. Glória Patri. * In via.
