Die 10 decembris
1. Beátæ Maríæ Vírginis de Loreto, in Itália, cuius venerátio ducit ad mystérium Incarnatiónis Verbi Dei pro salúte nostra contemplándum, nos docens ad vocatiónem christiánam æquo ánimo assentíri.
2. Eméritæ in Lusitánia, sanctæ Euláliæ, vírginis et mártyris, quæ, ut fertur, in iuveníli ætáte pro confessióne Christi vitam offérre non dubitávit.
3. Romæ in cœmetério Trasónis via Salária Nova, sancti Mauri, mártyris, quem sanctus Dámasus papa célebrat insóntem púerum nullo cruciátu a fide deiéctum.
4. Ancyræ in Galátia, sancti Gemélli, mártyris.
5. Romæ apud sanctum Petrum, sancti Gregórii papæ Tértii, qui Evangélium Germánis prædicáre curávit et advérsus iconoclástas Urbis ecclésias sacris I magínibus ornávit.
6*. In monastério Sancti Nicolái de Viotoríto in Calábria, sancti Lucæ, epíscopi Insulæ, qui pro bono páuperum et institutióne monachórum indefésse adlaborávit.
7. Londínii in Anglia, sanctórum mártyrum Edmúndi Gennings, presbyteri, et Swithíni Wells, qui, sæviénte Elísabeth regínæ Primæ persecutióne, cápite damnáti, prior quod sacérdos esset, alter quod illum hospítio recepísset, ante portam domicílii láqueo suspénsi sunt et usque ad mortem cruciátibus confécti.
8. Item Londínii, sanctórum Polydóri Plasden et Eustátii White, presbyterórum, atque beatórum Briáni Lacy, Ioánnis Mason et Sydnéii Hodgson, mártyrum, qui, eódem anno éadem supplícia Tybúrni passi sunt, álii quod sacerdótes Angliam petivíssent, álii quod illis auxílium præstitíssent.
9. Ibídem, Tybúrni, decem et novem post annis, sancti Ioánnis Roberts, ex Ordine Sancti Benedícti, et beáti Thomæ Somers, presbyterórum et mártyrum, qui, sub lacóbo rege Primo propter sacerdótium damnáti, sédecim latrónes ampléxi eódem patíbulo suspénsi sunt.
10*. In vico Vallés in pago Valentíno Hispániæ, beáti Gundisálvi Viñes Masip, presbyteri et mártyris, qui, témpore persecutiónis, pro Christo egrégium perégit ertamen.
11*. In vico Picadero de Paterna in eódem pago Hispániæ, beatórum mártyrum Antónii Martín Hernández, presbyteri, et Augustíni García Calvo, religiósi, e Societáte Salesiána, qui in eádem tempestáte ob Christi fidem stolam glóriæ accepérunt.
