Die 13 martii
1. Nicomedíæ in Bithynia, sanctórum mártyrum Macedónii, presbyteri, Patríciæ, uxóris, et Modéstæ, fíliæ.
2. Hermópoli in Ægýpto, sancti Sabíni, mártyris, qui multa passus est et tandem in flumen proiéctus occúbuit.
3. In Pérside, sanctæ Christínæ, mártyris, quæ, virgis percússa, martyrium consummávit sub Chósroe rege Persárum Primo.
4 *. Pictávii in Aquitánia, sancti Piéntii, epíscopi, qui beátæ Radegúndi surrimo auxílio fuit in cœnóbiis condéndis.
5. Híspali in Hispánia, sancti Leándri, epíscopi, qui, frater sanctórum Isidóri, Fulgéntii ac Florentínæ, prædicatióne et indústria sua gentem Visigothórum, Reccarédo rege eórum adiuvánte, ab ariána impietáte ad cathólicam fidem convértit.
6 *. In monastério Novaliciénsi ad pedes montis Cinísii in valle Segusína, sancti Eldrádi, abbátis, qui, divíni cultus studiósus, psaltérium emendávit novásque ecclésias exstruéndas curávit.
7. Córdubæ in Vandalícia Hispániæ regióne, pássio sanctórum Ruderíci, presbyteri, et Salomónis, mártyrum, quorum prior, cum Mahométum vere prophétam ab Omnipoténte missum crédere recusavísset, in cárcerem coniéctus est, ubi in Salomónem incúrrit, qui aliquámdiu ántea mahometánæ religióni adhæserat, et simul cápitis obtruncatióne agónis cursum glorióse perfecérunt.
8. Apud Camerínum in Picéno Itáliæ, sancti Ansovíni, epíscopi. 9 *. In monastério Cavénsi in Campánia, beáti Petri Secúndi, abbátis.
10 *. Oxónii in Anglia, beáti Agnélli de Pisis, presbyteri, qui, a sancto Francísco in Gálliam, dein in Angliam missus, Ordinem Minórum ibídem instítuit et sacras sciéntias promóvit.
11 *. Erenéi in pago Meduáno Gálliæ, beátæ Francíscæ Tréhet, vírginis e Congregatióne a Caritáte et mártyris, quæ ad púeros instituéndos et ægrótos curándos omni stúdio se cóntulit et, témpore gállicæ perturbatiónis, pro Christo martyrium ferro complévit.
Et álibi aliórum plurimórum sanctórum Mártyrum et Confessórum, atque sanctárum Vírginum.
r. Deo grátias.
v. Pretiósa in conspéctu Dómini, (T.P. Allelúia.)
r. Mors sanctórum eius, (T.P. Allelúia.)
r. Mors sanctórum eius, (T.P. Allelúia.)
Lectio brevis (Is 55, 6-7)
Quærite Dóminum, dum inveníri potest; invocáte eum, dum prope est. Derelínquat ímpius viam suam, et vir iníquus cogitatiónes suas; et revertátur ad Dóminum, et miserébitur eius, et ad Deum nostrum, quóniam multus est ad ignoscéndum.
Verbum Dómini. r. Deo grátias.
Sancta María et omnes Sancti intercédant pro nobis ad Dóminum, ut nos mereámur ab eo adiuvári et salvári, qui vivit et regnat in sǽcula sæculórum. r. Amen.
Absente sacerdote vel diacono, et in recitatione a solo, sic concluditur:
Dóminus nos benedícat, et ab omni malo deféndat, et ad vitam perdúcat ætérnam. r. Amen.
Et fidélium ánimæ per misericórdiam Dei requiéscant in pace. r. Amen.
v. Ite in pace. r. Deo grátias.
