Die 7 iulii
1. Commemorátio sancti Pantǽni Alexandríni, viri apostólici et omni sapiéntia adornáti, cuius stúdium et amor erga verbum Dei tantus fuísse tráditur, ut fide et devotióne succénsus ad Christi Evangélium géntibus prædicándum proficiscerétur, quæ in longínquis Oriéntis secéssibus recondúntur, ac demum, Alexandríam revérsus, ibi, sub Antoníno Caracálla imperatóre, in pace quiévit.
2. Eboríaci in pago Meldénsi Aquitániæ, sanctæ Ædilbúrgæ, abbatíssæ monastérii Farénsis, quæ, regis Anglórum orientálium fília, sevéra córporis abstinéntia perpetuáque virginitáte glóriam Deo réddidit.
3. Vintóniæ in Anglia, sancti Heddæ, epíscopi Sáxonum occidentálium, viri sapiéntia clari, qui e Dorcéstria in hanc civitátem sancti Biríni corpus tránstulit et sedem suam stabilívit.
4. Dryópoli in Francónia, sancti Willibáldi, epíscopi, qui, móriachus factus, per loca sancta multásque regiónes ad vitam monásticam instaurándam din peregrinátus est, tandem sancto Bonifátio, a quo primus huius civitátis epíscopus ordinátus est, in ópere Germániæ evangelizándæ subvénit et multas convértit ad Christum gentes.
5 *. Tamláchti in Hibérnia, sancti Mæl Ruain, epíscopi et abbátis, qui sacræ litúrgiæ celebratiónem, cultum sanctórum et monásticam disciplínam impénse instaurávit.
6. Urgélli in Cataláunia Hispániæ, sancti Odónis, epíscopi, qui, adhuc láicus pópuli acclamatióne eléctus et confirmátus, humilióres deféndit et ómnibus benígnum se præbuit.
7 *. Perúsiæ in Umbria, tránsitus beáti Benedícti papæ Undécimi, ex Ordine Prædicatórum, qui, benígnus et mitis, iurgiórum vindex et pacis amátor, brevi pontificátus sui spátio, Ecclésiæ pacem, disciplínæ instauratiónem, religiónis increméntum promóvit.
8 *. Fossáni in Subalpínis, beáti Oddíni Barotti, presbyteri, qui, párochus páuper et vita austérus, dum contágio sæviébat, die ac nocte totas vires consúmpsit in ægrótos et moribúndos.
9 *. Vintóniæ in Anglia, beatórum mártyrum Rogérii Dickirison, presbyteri, et Radúlphi Milner, agrícolæ et patrisfamílias páuperis et litterárum expértis, sed fide firmi, qui sub Elísabeth regína Prima simul capti sunt et patíbuli supplíciis necáti; cum illis beátus Lauréntins Humphrey commemorátur, qui, cum cathólicam fidem iúvenis ampléxus esset, incérto die ibídem suspéndio occúbuit.
10 *. In freto maris ante Rupifórtium in Gállia, beáti Ioánnis I oséphi Juge de Saint-Martin, presbyteri et mártyris, qui, canónicus Lemovicénsis, témpore gállicæ perturbatiónis propter sacerdótium in navi servitútis inhumáne deténtus est, ubi morbo consúmptus ad Dóminum migrávit.
11 *. Arausióne item in Gállia, beátæ Iphigeníæ a Sancto Matthæo (Francíscæ Maríæ Suzánnæ) de Gaillard de la Valdène, vírginis ex Ordine Sancti Benedícti et mártyris témpore gállicæ perturbatiónis.
12. Prope urbem Hemceuvénsem in Hunanénsi província Sinárum, sanctórum Antoníni Fantosati, epíscopi, et Ioséphi Maríæ Gambaro, presbyteri ex Ordine Minórum, qui, in persecutióne ab ásseclis « Yihetuan », cum ad ripam appulíssent ad fidélibus auxíliurri præstándum, lapidáti occubuérunt.
13. Apud urbem Ueihœivénsem in Hebei província item in Sinis, sancti Marci Ji Tianxiang, mártyris, qui, trigínta annos ab Eucharístiæ convívio prohíbitus quod ópii usu abstinére nolúerat, pium tamen vitæ éxitum imploráre non déstitit et, in iudícium vocátus constantíque ánimo fidem Christi proféssus, convívium ætérnum adéptus est.
14. In vico Hujiacun apud Slhenxian item in Mebei, sanctæ Maríæ Guo Lizhi, mártyris, quæ in eádem persecutióne, quasi áltera mater Macchabæórum, septem ex família sua, quos in locum supplícii comitabátur, ad ánimi constántiam confirmávit petens, ut ipsa póstea cæderétur; dénique, quos ad cælum præmíserat, eos subsecúta est.
15 *. In vico Rakunai in Nova Británnia Melanésiæ ínsula, beáti Petri To Rot, mártyris, qui, paterfamílias et catechísta, áltero totíus mundi bello sæviénte, comprehénsus quod in offício suo perseverásset, letális venéni iniectióne martyrium consummávit.
16 *. Legióne in Nicarágua, beátæ Maríæ Romero Meneses, vírginis ex Institúto Filiárum Maríæ Auxiliatrícis, quæ in diciónibus Oræ Dívitis pro institutióne puellárum, præsértim páuperum et derelictárum, benígne nisa est et pietátem erga Eucharístiam et Beátam Vírginem Maríam valde diffúdit.
Et álibi aliórum plurimórum sanctórum Mártyrum et Confessórum, atque sanctárum Vírginum.
r. Deo grátias.
v. Pretiósa in conspéctu Dómini, (T.P. Allelúia.)
r. Mors sanctórum eius, (T.P. Allelúia.)
r. Mors sanctórum eius, (T.P. Allelúia.)
Lectio brevis (Eccli 44,2.13-15)
Multam glóriam fecit Dóminus, magnificéntiam suam a sǽculo. Usque in ætérnum manet semen eórum, et glória eórum non derelinquétur. Córpora ipsórum in pace sepúlta sunt, et nomen eórum vivit in generatiónem et generatiónem; sapiéntiam ipsórum narrent pópuli, et laudem eórum núntiet ecclésia.
Verbum Dómini. r. Deo grátias.
Word of the Lord. r. Let us give thanks to God.
Sancta María et omnes Sancti intercédant pro nobis ad Dóminum, ut nos mereámur ab eo adiuvári et salvári, qui vivit et regnat in sǽcula sæculórum. r. Amen.
May Saint Mary and all the Saints intercede for us with the Lord, that we may deserve to be helped and saved by him who lives and reigns for ever and ever. r. Amen.
Absente sacerdote vel diacono, et in recitatione a solo, sic concluditur:
In the absence of a deacon or a priest, and in the recitation alone, it is concluded thus:
Dóminus nos benedícat, et ab omni malo deféndat, et ad vitam perdúcat ætérnam. r. Amen.
May the Lord bless us, forbid us from all evil, and bring us to eternal life. r. Amen.
Et fidélium ánimæ per misericórdiam Dei requiéscant in pace. r. Amen.
And may their souls rest in peace through the mercy of God. r. Amen.
v. Ite in pace. r. Deo grátias.
v. Go in peace. r. Let us give thanks to God.
The translations proposed here have the sole purpose of a better understanding of the Latin text. They are not to be used in place of the official translations in the liturgy in the vernacular.
