Léctio libri Exodi (2,1-15a)

  In diébus illis: Egréssus est vir de domo Levi et accépit uxórem stirpis suæ; quæ concépit et péperit fílium et videns eum elegántem abscóndit tribus ménsibus.Cumque iam celáre non posset, sumpsit fiscéllam scírpeam et linívit eam bitúmine ac pice; posuítque intus infántulum et expósuit eum in carécto ripæ flúminis, stante procul soróre eíus et consideránte evéntum rei. Ecce autem descendébat fília pharaónis, ut lavarétur in flúmine, et puéllæ eíus gradiebántur per crepídinem álvei. Quæ cum vidísset fiscéllam in papyrióne, misit unam e famulábus suis; et allátam apériens cernénsque in ea párvulum vagiéntem, misérta eíus ait: “De infántibus Hebræórum est hic.”Cui soror púeri: “Vis, inquit, ut vadam et vocem tibi mulíerem Hebrǽam, quæ nutríre possit tibi infántulum?” Respóndit: “Váde.” Perréxit puélla et vocávit matrem infántis. Ad quam locúta fília pharaónis: “Áccipe, ait, púerum istum et nutri mihi; ego dabo tibi mercédem tuam.” Suscépit múlier et nutrívit púerum adultúmque trádidit fíliæ pharaónis.Quem illa adoptávit in locum fílii vocavítque nomen eíus Móysen dicens: “quia de aqua tuli eum.”In diébus illis, postquam créverat, Móyses egréssus est ad fratres suos; vidítque afflictiónem eórum et virum Ægýptium percutiéntem quendam de Hebrǽis frátribus suis.Cumque circumspexísset huc atque illuc et nullum adésse vidísset, percússum Ægýptium abscóndit sábulo. Et egréssus die áltero conspéxit duos Hebrǽos rixántes dixítque ei, qui faciébat iniúriam: “quáre pércutis próximum tuum?”Qui respóndit: “Quis te constítuit príncipem et iúdicem super nos? Num occídere me tu vis, sicut occidísti Ægýptium?” Tímuit Móyses et ait: “Quómodo palam factum est verbum istud?”Audivítque phárao sermónem hunc et quærébat occídere Móysen.