Die 7 novembris
1. Patávii in Venétia, sancti Prosdócimi, qui huius Ecclésiæ primus epíscopus créditur fuísse.
2. Neocæsaréæ in Ponto, sancti Athenodóri, epíscopi, fratris sancti Gregórii Thaumatúrgi, qui ádeo in divínis elóquiis profécit, ut, etsi iúvenis, idóneus existimarétur múnere episcopáli fungi.
3. Apud Albiam in Aquitánia, commemorátio sancti Amaránthi, mártyris.
4. Meliténe in Arménia, sanctórum Hierónis et plurimórum sociórum, mártyrum.
5. Perúsiæ in Umbria, sancti Herculáni, epíscopi et mártyris, qui, iussu Tótilæ, Gothórum regis, cápite detruncátus est.
6*. Turónis in Néustria, sancti Baldi, epíscopi, qui in eleemósynis aurum, quod decéssor relíquerat, paupéribus distríbuit.
7*. In loco póstea Congresbúria nuncupáto in Anglia, sancti Cungári, abbátis, britónis génere, cuius nómine plures gloriántur pagi et ecclésiæ.
8. Argentoráti in Burgúndia, commemorátio sancti Floréntii, epíscopi, qui sancto Arbogásto succéssit.
9. Epternáci in Austrásia, deposítio sancti Willibrórdi, qui, génere anglus, a sancto Sergio papa Primo epíscopus Ultraiecténsis ordinátus, in Frísia et Dánia Evangélium prædicávit et sedes episcopáles necnon monastéria cóndidit, donec labóre gravátus ætatéque conféctus, in cœnóbio ab ipso fundáto in Dómino obdormívit.
10*. In monte Galésio prope Ephesum in Asia, sancti Lázari, stylítæ, qui váriis in locis super colúmnam plúrimos annos vixit, grávibus étiam ferraméntis et caténis onerátus, tantum pane et aqua conténtus, qua aspérrima vitæ ratióne plúrimos fiddles attráxit.
11. Colóniæ Agrippínæ in Lotharíngia Germániæ, sancti Engelbérti, epíscopi, qui, pro iustítia et Ecclésiæ libertátis defensióne, a sicáriis in via intercéptus multísque vulnéribus cæsus, occúbuit.
12*. In vico Pofì in Látio, beáti Antónii Baldinucci, presbyteri e Societáte Iesu, qui ad missiónes pópulis prædicándas totus se dedit.
13. In civitáte Ket Cńğ in Tunquíno, sanctórum Hyacínthi Castañeda et Vincéntii Lê Quang Liêm, presbyterórum ex Ordine Prædicatórum et mártyrum, qui, sub Trinh Såm regímine, evangélicos labóres sánguinis effusióne consummavérunt.
14. In loco Zunyi in província Guizhou Sinárum, sancti Petri Wu Guosheng, catechístæ et mártyris, qui pro Christo strangulátus est.
15*. Apud Cremónam in Itália, beáti Vincéntii Grossi, presbyteri, qui, parœciáli vacans múneri, Institútum Filiárum ab Oratório cóndidit.
