Die 9 novembris
1. Festum dedicatiónis basílicæ Lateranénsis in honórem Christi Salvatóris a Constantíno imperatóre exstrúctæ ut Romanórum episcopórum sedis, cuius anniversária celébritas in univérsa Latína Ecclésia signum exstat dilectiónis et unitátis cum papa Románo.
2. Apud Biturígas in Gállia, sancti Ursíni, primi epíscopi, qui Christum Dóminum pópulo nuntiávit et pro credéntibus, qui ex paupéribus máxime erant, domum Leocádii, Galliárum senatóris adhuc pagáni, fecit ecclésiam.
3. Neápoli in Campánia, sancti Agrippíni, epíscopi inter primos, quem defensórem civitátis antíqua monuménta declárant.
4*. Virodúni in Gállia Bélgica, sancti Vitónis, epíscopi.
5. Constantinópoli, sanctórum Eustóliæ et Sópatræ, vírginum et sanctimoniálium.
6*. Ludévæ in Gállia Narbonénsi, sancti Geórgii, epíscopi.
7*. Signæ apud Floréntiam in Etrúria, beátæ loánnæ, vírginis, quæ vitam pro Christo duxit solitáriam.
8*. Ancónæ in Picéno Itáliæ, beáti Gabriélis Ferretti, presbyteri ex Ordine Minórum, qui parvulórum ægrotorúmque cura, obœdiéntia et regulári observántia cláruit.
9*. Bonóniæ in Æmília, beáti Ludovíci Morbioli, qui, a sémita vitiórum ad Deum convérsus, aspérrimam vitæ ratiónem pǽnitens elégit civésque ad pietátem verbo et exémplo revocávit.
10*. Muráni in Venétia, beáti Grátiæ de Cátharo, religiósi ex Ordine Sancti Augustíni, qui, dum in magna egestáte cymbam ducébat, ut victum sibi comparáret, conciónibus beáti Simónis de Cameríno motus, religiósum hábitum impetrávit et vitam duxit piíssimam.
11*. Oxónii in Anglia, beáti Geórgii Napper, presbyteri et mártyris, qui tarn in clandestíno ministério, tarn in cárcere mire operátus est, ut Christo in Ecclésia ánimas lucrarétur, et sub lacóbo rege Primo propter sacerdótium martyrii corónam accípere méruit.
12*. Divióne in Gállia, beátæ Elísabeth a Sanctíssima Trinitáte Catez, vírginis ex Ordine Carmelitárum Discalceatárum, quæ a puerítia ad Trinitátem in imo corde inquiréndam et contemplándam stúduit et adhuc iúvenis, multis afflícta cruciátibus, "ad amórem, ad lucem, ad vitam", sicut optáverat, perréxit.
13*. In óppido Borysów in Polónia, beáti Henríci Hlebowicz, presbyteri et mártyris, bello sæviénte in ódium fídei plumbis interfécti.
14*. Romæ, beáti Aloysii Beltrame Quattrocchi, qui, paterfamílias, turn in públicis cum in domésticis negótiis mandáta Christi servávit et diligéntia ac probitáte vitæ proclamávit.
