Die 18 decembris
1. Commemorátio sancti Malachíæ, prophétæ, qui, post transmigratiónem Babylóne diem magnum Dómini eiúsque advéntum in ternplum nuntiávit sempérque et ubíque mundam oblatiónem nómini eius offeréndam.
2. In Africa, commemorátio sanctórum mártyrum Namphamónis, Mígginis, Sanámis et Lucítæ, qui, teste Máximo Madaurénsi gentíli in epístula ad sanctum Augustínum scripta, magnæ veneratióni pópulo christiáno erant.
3. Turónis in Gállia Lugdunénsi, sancti Gatiáni, primi epíscopi, qui ad illam civitátem ab urbe Roma transmíssus esse refértur et in ipsíus vici cœmetério christianórum sepúltus.
4*. Laóniæ in Hibérnia, sancti Flannáni, epíscopi.
5*. In monastério Heidenheiménsi in Bavária, sancti Winebáldi, abbátis, qui, anglus natióne, cum fratre sancto Willibáldo sanctum Bonifátium secútus est et adiúvit in germánis géntibus evangelizándis.
6. In colle Gò-Voi in Tunquíno, sanctórum Pauli Nguyen Văn My, Petri Truóng Văn Duòng et Petri Vü Văn Truât, mártyrum, qui, catechístæ, firmi in fide sub imperatóre Minh Mąng stranguláti sunt.
7*. Borgári prope Augústam Taurinórum in Itália, beátæ Nemésiæ (Iúliæ) Valle, vírginis ex Institúto Sorórum a Caritáte, quæ, in iuvénibus instruéndis et in amóre Evangélii moderándis exímia, viam mandatórum Dómini per próximi dilectiónem iúgiter currit.
