Léctio Actuum Apostolórum (7,55-60)

  In diebus illis: Cum esset Stéphanus plenus Spíritu Sancto, inténdens in cælum vidit glóriam Dei et Iésum stantem a dextris Dei et ait: “Ecce vídeo cælos apértos et Fílium hóminis a dextris stantem Dei.”Exclamántes autem voce magna continuérunt aures suas et ímpetum fecérunt unanímiter in eum et eiciéntes extra civitátem lapidábant. Et testes deposuérunt vestiménta sua secus pedes adulescéntis, qui vocabátur Saulus. Et lapidábant Stéphanum invocántem et dicéntem: “Dómine Iésu, súscipe spíritum meum.”Pósitis autem génibus clamávit voce magna: “Dómine, ne státuas illis hoc peccátum”; et cum hoc dixísset, obdormívit.

  Léctio Actuum Apostolórum (25,13b-21)

  In diébus illis: Agríppa rex et Berénice descendérunt Cæsaréam et salutavérunt Festum.Et cum dies plures ibi demoraréntur, Festus regi indicávit de Paulo dicens: “Vir quidam est derelíctus a Felíce vinctus, de quo, cum essem Hierosólymis, adiérunt me príncipes sacerdótum et senióres Iudæórum postulántes advérsus illum damnatiónem; ad quos respóndi, quia non est consuetúdo Románis donáre áliquem hóminem, priúsquam is, qui accusátur, præséntes hábeat accusatóres locúmque defendéndi se ab accusatióne accípiat. Cum ergo huc conveníssent, sine ulla dilatióne sequénti die sedens pro tribunáli iússi addúci virum; de quo, cum stetíssent accusatóres, nullam causam deferébant, de quibus ego suspicábar malis;quæstiónes vero quasdam de sua superstitióne habébant advérsus eum et de quodam Iésu defúncto, quem affirmábat Paulus vívere. Hǽsitans autem ego de huiúsmodi quæstióne, dicébam si vellet ire Hierosólymam et ibi iudicári de istis. Paulo autem appellánte, ut servarétur ad Augústi cognitiónem, iússi servári eum, donec mittam eum ad Cǽsarem.”