In secundo nocturno, anno I )
Lectio
Ex Homilíis sancti Ioánnis Chrysóstomi epíscopi (Hom. 2, 1 de sancta Pentecoste: PG 50, 463-464)
Nuper festum crucis celebrávimus, passiónis, resurrectiónis ac deínde Dómini nostri Iesu Christi in cælos ascénsus; hódie tandem ad ipsum culmen bonórum provécti sumus, ad ipsam metrópolim festórum evásimus, ad fructum ipsum domínicæ promissiónis pervénimus. Si enim abíero, inquit, ego álium Paráclitum mittam vobis, et non relínquam vos órphanos. Vidétis sollicitúdinem? Vidétis ineffábilem benignitátem?
Ante hos dies in cælum ascéndit, régium thronum recépit, sedem ad Patris déxteram recuperávit; et hódie nobis Sancti Spíritus advéntum largítur, ac per ipsum de cælis sexcénta nobis bona suppéditat. Quid enim, quæso, eórum, quibus salus nostra continétur, non per Spíritum dispensátum est nobis? Per ipsum a servitúte liberámur, in libertátem vocámur, in adoptiónem dedúcimur, ac dénuo, ut ita dicam, fíngimur, grave fœtidúmque peccatórum onus depónimus: per Spíritum Sanctum sacerdótum cérnimus choros, doctórum órdines habémus: ab hoc fonte manant et revelatiónum donatiónes et grátiæ sanitátum; et réliqua ómnia, quibus Ecclésia Dei condecorári solet, inde promúntur.
Hoc illud est quod clamat Paulus his verbis: Hæc ómnia operátur unus atque idem Spíritus, dívidens privátim síngulis prout vult: prout vult, inquit, non prout iubétur: dívidens, non divísus; auctórem se præbens, non auctoritáti subiéctus. Eámdem quippe potestátem, quam Patrem habére testátus est, hanc et Spíritui Sancto Paulus attríbuit. Et quemádmodum de Patre dicit: Deus vero est qui operátur ómnia in ómnibus; sic de Spíritu Sancto: Hæc ómnia, inquit, operátur unus atque idem Spíritus, dívidens privátim síngulis prout vult. Viden' tu perféctam potestátem? Quorum enim natúra est una, haud dúbium quin eórum una sit auctóritas: et quorum æquális honóris est maiéstas, eórum et virtus ac potéstas est una.
r. Ego rogábo Patrem, et álium Paráclitum dabit vobis, ut máneat vobíscum in ætérnum, * Spíritum veritátis, allelúia. v. Si enim non abíero, Paráclitus non véniet ad vos; si autem abíero, mittam vobis eum. * Spíritum. v. Glória Patri. * Spíritum.
